სამეფო კლუბის გერმანელმა ფეხბურთელმა სამი ხედირამ, ჟურნალისტებს ინტერვიუ მისცა სადაც განაცხადა, რომ სანტანდერელების დამარცხება აუცილებელია, რადგან მადრიდის "რეალი" არ აპირებს ლიდერის პოზიციის დაკარგვას...

"გამარჯვება აუცილებელია და ჩვენ ამისთვის ყველაფერს გავაკეთებთ. გუნდი წინ მიიწევს და ამას ყველა ხედავს. "მილანთან" ძალიან კარგი თამაში ჩავატარეთ და დამაჯერებლადაც გავიმარჯვეთ, "რასინგთანაც" იგივეს გაკეთებას ვაპირებთ."

"მარსელო შესანიშნავი ფეხბურთელია და მე დარწმუნებული ვარ მის ბრწყინვალე შესაძლებლობებში, იგი ძალიან კარგად ფლობს ბურთს და თითოეულ ვარჯიშზე მოურინიოსგან დიდ კომპლიმენტებს იღებს, ბრაზილიელის პროგრესი კიდევ გაგრძელდება, ის "ბლანკოსისთვის" ძალიან მნიშვნელოვანი ფეხბურთელია."

"პრიმერაში რთული კალენდარი გვაქვს და საერთოდ ძალიან გადატვირთული გრაფიკია, მაგრამ ჩვენ მადრიდის "რეალი" ვართ და თითოეული დაბრკოლება უნდა გადავლახოთ, ახლა მხოლოდ რასინგზე ვფიქრობთ და ვთვლით, რომ გამარჯვების მიღწევა შესაძლებელია."

"ბერნაბეუზე შეკრებილი პუბლიკა ყოველთვის ძალიან გვამხნევებს და დიდ სტიმულს გვაძლევს, ეს ჩვენთვის ძალიან მნიშვნელოვანია. იტალიელებთან მატჩში 90 წუთის მანძილზე არ გაჩერებულა მადრიდელი გულშემატკივარი, ამით ძალიან ბედნიერები ვიყავით."

"კარიმ ბენზემა და გონსალო იგუაინი შესანიშნავი ფორვარდები არიან და დარწმუნებული ვარ ისინი შეძლებენ სანტანდერელთა კარის დალაშქვრას. ჩვენზე ბევრი საუბარი მიდიოდა იმის შესახებ, რომ გოლის გატანას ვერ ვახერხებდით და ასე შემდეგ, მაგრამ იდეალური თამაშით ყველა კრიტიკოსი გავაჩუმეთ, "რასინგთან" კვლავ ბევრი უნდა გავიტანოთ."

"3 ქულის მოპოვება მნიშვნელოვანი იქნება სატურნირო თვალსაზრისით, ჩვენი უახლოესი მდევრები სულ ცოტატი ჩამოგვრჩებიან, ამიტომ წაბორძიკების დრო ნამდვილად არ არის, ყველაფერი უნდა გავაკეთოთ გამარჯვებისათვის."