მოგეხსენებათ, ხვალ ლა ლიგის მერვე ტურში, მადრიდის "რეალი" სანტანდერის რასინგს დაუპირისპირდება, რომელშიც ადრე სერხიო კანალესი თამაშობდა. ესპანელმა ფეხბურთელმა მატჩთან დაკავშირებით ისაუბრა, მისი თქმით "ბლანკოსმა" სანტანდერელებს მაღალი დონის ფეხბურთი უნდა შესთავაზოს...

"დიდებული წინახაზელები გვყავს, რომელსაც ბევრი გოლის გატანა შეუძლიათ, მათ უკვე დაამწუხრეს სხვადასხვა გუნდის მეკარეები. გუნდი კარგად თამაშობს და შედეგიც სახეზეა."

"სამეფო კლუბში ჩემზე ძალიან ბევრმა ფეხბურთელმა მოახდინა შთაბეჭდილება, მაგრამ კრიშტიანო რონალდო მსოფლიოს საუკეთესო ფეხბურთელია, იგი აღმაფრთოვანებს."

"მუდამ მაღალ დონეზე თამაში რა თქმა უნდა ძალიან რთულია, მაგრამ ცხრილის ლიდერები ვართ და აუცილებელია პოზიციების გამყარება, ჩვენ ყველაფერს ვაკეთებთ მაღალი დონის ფეხბურთის საჩვენებლად."

"შაბათის მატჩი უმნიშვნელოვანესი იქნება ჩემთვის, რადგან სწორედ რასინგში ვთამაშობდი, ამ გუნდთან კარგი მოგონებები მაკავშირებს. ჩვენ უნდა ვითამაშოთ სრული შემართებით და დავამარცხოთ მეტოქე."