რობერტო კარლოსმა სამეფო კლუბში არსებულ ვითარება მიმოიხილა და ფეხბურთელებს წარმატებები უსურვა.

როგორ შეაფასებ „მადრიდის რეალში“ არსებულ ამჟამინდელ სიტუაციას?

 გუნდში ძალიან ჯანსაღი და სამუშაო ატმოსფეროა. „რეალი“ ყოველთვის უმაღლესი მიზნებისთვის იბრძვის და ახლაც სწორედ ასეთი განწყობაა. გუნდს აქვს უდიდესი რესურსი და პოტენციალი, რომელიც აუცილებლად ბოლომდე უნდა გამოვიყენოთ. როდესაც ასეთი სიღრმის შემადგენლობა გვყავს, თითოეულ დეტალს გადამწყვეტი მნიშვნელობა ენიჭება.

რა შეგიძლია თქვა გუნდის ახალწვეულებზე - იბრაჰიმა კონატეზე, იან დიომანდესა და მარკ კუკურეიაზე?

სამივე მათგანი უმაღლესი დონის ფეხბურთელია და გუნდს ზუსტად ის თვისებები შემატეს, რაც გვაკლდა. კონატემ დაცვას სიმტკიცე შესძინა, დიომანდე საოცარი ტალანტია, ხოლო კუკურეიაზე საუბარი შორს წაგვიყვანს. მათმა მოსვლამ გუნდი ბევრად უფრო მრავალფეროვანი გახადა.

როგორც ლეგენდარული მარცხენა მცველი, განსაკუთრებით როგორ შეაფასებთ მარკ კუკურეიას თამაშს?

მარკ კუკურეია დღესდღეობით მსოფლიოს ერთ-ერთი საუკეთესო მარცხენა მცველია, რომელსაც უდიდესი შესაძლებლობები აქვს. ის მოედანზე საოცარ ენერგიას დებს, შესანიშნავია როგორც დაცვით ფუნქციებში, ისე შეტევაში ჩართვისას. მისი სათამაშო ინტელექტი და დაუღალავი შრომა „რეალისთვის“ ფასდაუდებელია.

რა არის კუკურეიას მთავარი პლიუსი, რაც „რეალს“ ასე სჭირდებოდა?

ბალანსი. ის იდეალურად ფარავს მთელ ფლანგს, აგრესიულია პრესინგისას და სწორად იღებს გადაწყვეტილებებს შეტევის ფაზაში. ასეთი ტიპის მცველი გუნდს საშუალებას აძლევს, ტაქტიკურად უფრო მოქნილი იყოს.

რას იტყვით იბრაჰიმა კონატეს როლზე დაცვის ხაზის სტაბილურობაში?

კონატემ დაცვაში სიმშვიდე და ფიზიკური დომინაცია მოიტანა. ის საჰაერო დუელებში თითქმის უშეცდომოა და ამავდროულად, საკმარისად სწრაფია იმისთვის, რომ მაღალი დაცვის ხაზის დროს სივრცეები აკონტროლოს.

გადავიდეთ ახალგაზრდა ტალანტებზე. რა შეგიძლიათ თქვათ არდა გიულერის შესახებ?

არდა გიულერი უნიკალური ტექნიკით დაჯილდოებული ფეხბურთელია. მას აქვს ბურთის საოცარი ხედვა, მოედნის შეგრძნება და ისეთი პასი, რომელსაც მცველები ვერ პროგნოზირებენ. მთავარია, მან განაგრძოს მუშაობა. არდას აქვს ყველაფერი, რომ „რეალის“ ეპოქალური მოთამაშე გახდეს.

რას ელოდებით იან დიომანდესგან და როგორია მისი პერსპექტივები?

იან დიომანდეს უდიდესი პერსპექტივები აქვს. ის არის მოთამაშე, რომელსაც შეუძლია მატჩის ბედი სრულიად დამოუკიდებლად, ერთ ეპიზოდში გადაწყვიტოს. მისი პროგრესი უკვე თვალსაჩინოა და დარწმუნებული ვარ, ფეხბურთის მოყვარულებს კიდევ ბევრად მეტს აჩვენებს.

კონკრეტულად რა კომპონენტებში გამოარჩევდით დიომანდეს?

უპირველესყოვლისა, მისი ფენომენალური სისწრაფე და ფეთქებადი პირველი ნაბიჯი. გარდა ამისა, მას აქვს უძლიერესი და ზუსტი დარტყმა, შესანიშნავი დრიბლინგი და გოლის ალღო. როდესაც დიომანდე სივრცეს იღებს, მისი შეჩერება მცველებისთვის პრაქტიკულად შეუძლებელია.

ვინისიუს ჟუნიორზე რას იტყვით, რომელიც გუნდის ერთ-ერთიმთავარი ძალაა, თუმცა ახლა საუკეთესო ეპოქა არ აქვს...

ცალსახად ვიტყვი. ადრე თუ გვიან ვინისიუსი ოქროს ბურთს მოიგებს! მისი საუკეთესო დროებაც მალე დადგება. ვინი ყოველწლიურად ვითარდება, იღებს მეტ პასუხისმგებლობას და უკვე არის მოთამაშე, რომელიც მსოფლიო ფეხბურთში ამინდს ქმნის.

რა ხდის ვინისიუსს ასეთ განსაკუთრებულ ფეხბურთელად?

მისი მენტალიტეტი და უშიშრობა. მას არ ეშინია შეცდომის და ყველაზე რთულ მომენტშიც კი მზადაა თამაში საკუთარ თავზე აიღოს. ის მოედანზე განსხვავებას ქმნის, ასეთი ფეხბურთელები კი ძალიან ცოტანი არიან.

გადავიდეთ მთავარ მწვრთნელზე. როგორ შეაფასებთ ჟოზე მოურინიოს მუშაობას „რეალში“?

ჟოზე მოურინიო არის მწვრთნელი, რომელსაც გამარჯვებულის „დნმ“ აქვს. მან გუნდს მოუტანა მაქსიმალური დისციპლინა, ტაქტიკური სიზუსტე და მენტალური სიმტკიცე. ჟოზემ ზუსტად იცის, როგორ მიიღოს თითოეული ფეხბურთელისგან მაქსიმუმი.

ტაქტიკური თვალსაზრისით, რა შეცვალა მოურინიომ გუნდის თამაშში?

მან შექმნა იდეალური ბალანსი დაცვასა და შეტევას შორის. გუნდი ბევრად უფრო სწრაფად გადადის დაცვიდან შეტევაზე და პრესინგსაც ბევრად უფრო ორგანიზებულად მიმართავს. ჟოზეს „რეალი“ მეტოქის შეცდომებს მომენტალურად სჯის.

როგორ ახერხებს მოურინიო ასეთი ვარსკვლავური შემადგენლობის მართვას?

ჟოზე გენიალური ფსიქოლოგია. მან იცის, ვის როდის სჭირდება მხარდაჭერა და ვის  კრიტიკა. მოთამაშეებს სჯერათ მისი ფილოსოფიის, რადგან ხედავენ, რომ მისი გადაწყვეტილებები შედეგზეა ორიენტირებული. გასახდელში სრული ნდობა და პატივისცემაა.

ზოგიერთი კრიტიკოსი მოურინიოს სტილს მეტისმეტად პრაგმატულს უწოდებს. ეთანხმებით ამას?

სრულიად არ ვეთანხმები. ფეხბურთში მთავარი კრიტერიუმი შედეგია, მაგრამ ამავდროულად, ნახეთ, რამდენ გოლს იტანს გუნდი. მოურინიო პრაგმატული კი არა, ჭკვიანია. ის ეგუება მეტოქეს და იყენებს საკუთარი გუნდის ძლიერ მხარეებს.

ფიქრობთ, რომ მოურინიოსთან ერთად „ბლანკოსს“ შეუძლია ახალი ეპოქის შექმნა?

დიახ, ამის ყველა წინაპირობა არსებობს. მას აქვს მკაფიო ხედვა, გამოცდილება და, რაც მთავარია, უმაღლესი კლასის შემადგენლობა. ჟოზეს ხელში ეს გუნდი კიდევ უფრო გაძლიერდება. მესმის, რომ „ბარსელონა“ შესანიშნავ ფორმაშია და ლა ლიგაში 6 ქულიანი სხვაობა შექმნა, თუმცა სამეფო კლუბი კიდევ მოუმატებს. პირადად მე ძალიან მჯერა „განსაკუთრებულის“ და მისი თავდადების.

 თქვენ რამდენჯერმე ახსენეთ გუნდის უდიდესი რესურსი. როგორ უნდა მოხდეს მისი სრული რეალიზება?

სეზონი გრძელია და ყველა ტურნირზე გამარჯვება გვსურს. მთავარია სწორი როტაცია და თითოეული მოთამაშის მზადყოფნა. როდესაც სათადარიგოთა სკამიდან შემოსულ ფეხბურთელს შეუძლია თამაშის სცენარის შეცვლა, ეს ნიშნავს, რომ რესურსს სწორად იყენებ.

რას ელოდებით მოახლოებული ელ კლასიკოსგან?

ელ კლასიკო ყოველთვის განსაკუთრებული მატჩია, მაგრამ ამჯერად ფსიქოლოგიური და სატურნირო წნეხი კიდევ უფრო დიდია. ეს არის თამაში, სადაც მხოლოდ სამი ქულა არ თამაშდება, აქ იწერება სეზონის სცენარი.

რატომ არის ეს კონკრეტული ელ კლასიკო ასეთი კრიტიკული „რეალისთვის“?

ამ მატჩის მოუგებლობა „რეალს“ დიდ პრობლემებს შეუქმნის. სატურნირო ცხრილში ჩამორჩენა ან ინიციატივის დათმობა ამ ეტაპზე ძალიან სახიფათოა. გუნდს არ აქვს შეცდომის უფლება, თუ სურს, რომ ჩემპიონატში სიტუაცია გააკონტროლოს.

მატჩი „კამპ ნოუზე“ იმართება. რა იქნება გასაღები იქ წარმატების მისაღწევად?

„კამპ ნოუზე“ თამაში ყოველთვის უდიდეს წნეხთან არის დაკავშირებული, ამიტომ გუნდმა წარმატებისთვის ყველაფერი უნდა გაიღოს. საჭიროა ცივი გონება, პირველივე წუთებიდან აგრესიული თამაში და საკუთარი შანსების მაქსიმალური გამოყენება.

რა იქნება თქვენი საბოლოო გზავნილი გუნდისა და ფანებისთვის ამ დიდი მატჩის წინ?

ირწმუნეთ გუნდის! გვყავს ფანტასტიკური მოთამაშეები, დიდი რესურსი და მწვრთნელი, რომელმაც იცის, როგორ მოიგოს ასეთი შეხვედრები. ბიჭები მოედანზე სულს და გულს დადებენ, რათა მადრიდისტები გაახარონ.