ლა ლიგის მიმდინარე გათამაშება იმ ფაზაში შედის, სადაც თითოეულ ქულას ოქროს ფასი ედება, ხვალ კი სანტიაგო ბერნაბეუს მინდორზე ერთ-ერთი ყველაზე საინტერესო და დაძაბული დაპირისპირება შედგება. მადრიდის „რეალი“ საკუთარ მოედანზე „ვილიარეალს“ უმასპინძლებს. გუნდს, რომელიც ყოველთვის გამოირჩევა ორგანიზებული, აგრესიული და მოქნილი ფეხბურთით. სამეფო კლუბისთვის ეს შეხვედრა უბრალოდ მორიგი 90 წუთი არ იქნება,  ეს არის სატურნირო ცხრილის სათავეში პოზიციების განმტკიცების, საჩემპიონო რბოლაში ლიდერობის შენარჩუნებისა და საკუთარი ძალების კიდევ ერთხელ დემონსტრირების შესაძლებლობა.

წლევანდელ სეზონში „ყვითელი წყალქვეშა ნავი“ საკმაოდ სტაბილურ და პრაგმატულ ფეხბურთს აჩვენებს. მწვრთნელის მიერ სტრუქტურირებული გუნდი განსაკუთრებულ აქცენტს აკეთებს კომპაქტურ 4-4-2 ან მოქნილ 4-3-3 სქემაზე, სადაც ხაზებს შორის სივრცეები მინიმუმამდეა დაყვანილი. „ვილიარეალის“ მიმდინარე სეზონის სათამაშო ასპექტებიდან გამოირჩევა სწრაფი, ვერტიკალური გადასვლა დაცვიდან შეტევაში და მაღალი ინტენსივობა ბურთის დაკარგვისთანავე. მათ იციან, როგორ შეავიწროონ მეტოქე მოედნის ცენტრში და დაელოდონ მეტოქის შეცდომას, რათა მყისიერი კონტრშეტევით დასაჯონ.

სამეფო კლუბთან მატჩში „ვილიარეალის“ სავარაუდო გეგმა სავარაუდოდ  დაბალ და საშუალო ბლოკში მჭიდრო დაცვას და ფრთხილ ტაქტიკას დაეყრდნობა. სტუმრები ეცდებიან, მადრიდელებს წაართვან სივრცეები ფლანგებსა და მცველების ზურგს უკან, სადაც „ბლანკოსის“ შემტევები ყველაზე საშიშები არიან.  ტაქტიკური ჩანაფიქრი, სავარაუდოდ, მოიცავს ცენტრალური ზონის ჩაკეტვას, მადრიდელთა ნახევარდაცვის პრესინგის ქვეშ მოქცევას და სწრაფი ფრთების გამოყენებას საპასუხო შეტევების განვითარებისთვის.

ჟოზე მოურინიოს „რეალი“ კი ამ მატჩს სრული საბრძოლო განწყობითა და მაღალი სათამაშო დისციპლინით ხვდება. პორტუგალიელი სპეციალისტის ხელში გუნდმა შეიძინა განსაკუთრებული პრაგმატიზმი, ტაქტიკური მოქნილობა და გამარჯვებულის მენტალიტეტი, რაც მძიმე მატჩების ბოლომდე მიყვანაში ეხმარება. მოურინიოს სათამაშო ფილოსოფია ეფუძნება სწრაფ, დაუნდობელ გარდაქმნებს დაცვიდან შეტევაში, დაცვის ხაზის  სიმტკიცეს და სტანდარტული სიტუაციების მაქსიმალურ ეფექტურობას, რაც ასეთ პრინციპულ დაპირისპირებებში ხშირად გადამწყვეტი ფაქტორი ხდება.

სატურნირო ვითარებიდან გამომდინარე, მადრიდელებისთვის ხვალინდელი 3 ქულა ჰაერივით საჭიროა. ლა ლიგაში შექმნილი უმძიმესი კონკურენცია და საჩემპიონო რბოლის წარმოუდგენლად მაღალი ტემპი არავის აძლევს მოდუნების უფლებას/ უმნიშვნელო შეცდომამ ან ქულების დაკარგვამ შესაძლოა სატურნირო ცხრილში არსებული არც ისე სახარბიელო მდგომარეობა კიდევ დააკარგვინოს გუნდს. ამიტომ, ბერნაბეუზე ქულების დათმობა მოურინიოს კოლექტივის გეგმებში არანაირად არ შედის. ამ ეტაპისთვის „ბარსელონასთან“ არსებული 6 ქულა თვალშისაცემი ჩამორჩენაა.

სათამაშო სქემაში ცენტრალურ ფიგურად რჩება ჯუდ ბელინგემი, რომლის როლი ნახევარდაცვისა და შეტევის დამაკავშირებელ ხიდში უმნიშვნელოვანესია. ინგლისელი ნახევარმცველის უნარი, გაარღვიოს მეტოქის დაცვითი ხაზები, იპოვოს სივრცეები საჯარიმოსთან და შეტევის ფინალურ ფაზაში თავად მოევლინოს გუნდს მეგოლედ, „ვილიარეალის“ მჭიდრო დაცვის გასატეხად ერთ-ერთი მთავარი გასაღები იქნება. ბელინგემის ტაქტიკური ინტელექტი და უბურთოდ მოძრაობა მადრიდელთა შეტევებს დამატებით სიღრმესა და არაპროგნოზირებადობას სძენს.

არანაკლებ მნიშვნელოვანი იქნება კილიან მბაპესა და ვინისიუს ჟუნიორის დუეტის ეფექტურობა შეტევის წინა ხაზზე. ფრანგი თავდამსხმელის ფენომენალური სიჩქარე, პოზიციური შეგრძნება და ცივსისხლიანი დამაგვირგვინებელი დარტყმები, ვინისიუსის ინდივიდუალურ დრიბლინგსა და ფლანგური იერიშების სიმწვავესთან კომბინაციაში, ნებისმიერი დაცვისთვის უდიდეს თავსატეხს წარმოადგენს. „ვილიარეალის“ კომპაქტური ბლოკის წინააღმდეგ სწორედ ამ მოთამაშეთა ინდივიდუალური ოსტატობა და სწრაფი გადაწყვეტილებები შეიძლება გახდეს მატჩის ბედის გადამწყვეტი ფაქტორი.

შაბათს საღამოს სანტიაგო ბერნაბეუზე ნამდვილი ტაქტიკური ომი გველოდება, სადაც ერთმანეთს შეეჯახება ორგანიზებული, დისციპლინირებული „ვილიარეალი“ და საჩემპიონო ამბიციებით აღჭურვილი, მოურინიოს მადრიდის „რეალი“. სამეფო კლუბისგან გულშემატკივარი პირველივე წუთებიდან აგრესიულ, მაღალი ინტენსივობის ფეხბურთს ელის, ხოლო მატჩის საბოლოო შედეგს ის მცირე დეტალები და ინდივიდუალური ოსტატობის გამოვლინებები გადაწყვეტს, რომლებიც დიდ შეხვედრებს ყოველთვის განსაკუთრებულ ელფერს სძენს.