მესუთ იოზილმა არდა გიულერს ხოტბა შეასხა და განაცხადა, რომ თურქი საოცარ კონდიციაშია.

– მოგესალმები მესუთ. ბოლო დროს მადრიდის „რეალში“ არდა გიულერის თამაშს დიდი გამოხმაურება აქვს. როგორ შეაფასებდი მის განვითარებას?

– არდას საოცარი პროგრესი აქვს და ამას თითოეულ მატჩში ამტკიცებს. როდესაც „ფენერბახჩედან“ „რეალში“ გადადიოდა, ვიცოდი, რომ უდიდესი ტალანტი იყო, მაგრამ ის, თუ როგორ სწრაფად გაიზარდა ტაქტიკურად და ფსიქოლოგიურად ასეთ გრანდში, მართლაც შთამბეჭდავია.

– ტექნიკური თვალსაზრისით, რა არის ის მთავარი თვისება, რაც მას მოედანზე გამორჩეულს ხდის?

– ის შესანიშნავად ფლობს ბურთს და მისი კონტროლის ტექნიკა უმაღლესი დონისაა. ბურთი თითქოს ფეხზე აქვს მიწეპებული, რაც  საშუალებას აძლევს, ყველაზე მჭიდრო სივრცეებშიც კი მშვიდად მიიღოს სწორი გადაწყვეტილებები.

– ბევრი ფეხბურთის ექსპერტი არდას თქვენს სათამაშო სტილს ადარებს. კონკრეტულად რას გამოყოფდით მის თამაშში?

– განსაკუთრებით მინდა გამოვყო მისი მოედნის არნახული ხედვა. მას შეუძლია დაინახოს პასის ტრაექტორია იქ, სადაც სხვები ვერაფერს ამჩნევენ და თამაშის რიტმი ერთი შეხებით შეცვალოს, რაც თანამედროვე ფეხბურთში იშვიათი ნიჭია.

– ესპანეთში გადასვლისას ერთ-ერთი მთავარი გამოწვევა ფიზიკური მომზადება იყო. ამ კომპონენტში თუ ამჩნევთ ცვლილებებს?

– დიახ, ფიზიკური კონდიციების გაუმჯობესება თვალსაჩინოა. მან ბევრი იმუშავა ძალისმიერ მაჩვენებლებზე და გამძლეობაზე, რისი წყალობითაც ახლა ბევრად მარტივად უძლებს ლა ლიგის მაღალ ინტენსივობასა და ორთაბრძოლებს.

– თქვენი აზრით, რა არის მისი მაქსიმალური პოტენციალი და რას ელოდებით მისგან მომავალში?

– არდას აქვს ყველა მონაცემი იმისათვის, რომ მსოფლიო ფეხბურთის მწვერვალზე ავიდეს. თუ ის ასეთივე შრომისმოყვარეობითა და თავმდაბლობით გააგრძელებს განვითარებას, დარწმუნებული ვარ, თავის ეპოქას შექმნის. გიულერის სახით TOP ვარსკვლავს ვხედავთ.“