ჟოზე მოურინიოს „რეალში“ დაბრუნებამ ან მისმა ახალმა ტაქტიკურმა ხელწერამ გუნდს უკვე დაატყო მკაფიო იერ-სახე,დისციპლინირებული, ფიზიკურად ძლიერი და სწრაფ გარდაქმნებზე ორიენტირებული სტრუქტურა. სამეფო კლუბს ნამდვილად ეტყობა პორტუგალიელი სპეციალისტის ხასიათი და მოედანზე მკაცრად გაწერილი ფუნქციები. თუმცა, პრესეზონის ამხანაგურ შეხვედრებში გამოკვეთილი მთავარი საფიქრალი ოფიციალურ მატჩებშიც რეალობად იქცა. „რეალს“ ნახევარდაცვაში კრეატივისა და პოზიციურ შეტევაში სივრცეების გაჭრის სერიოზული პრობლემა აქვს, რაც დაბალ ბლოკში მდგარი მეტოქეების წინააღმდეგ განსაკუთრებით თვალსაჩინო ხდება.

შექმნილ ვითარებაში სულ უფრო იზრდება არდა გიულერის როლი და მნიშვნელობა ახალი „რეალის“ სათამაშო სქემაში. თურქი პლეიმექერი ხდება ის ერთადერთი საიმედო ხიდი ნახევარდაცვასა და თავდასხმას შორის, ვისაც ბურთის მიღება, თამაშის ტემპის მართვა და მოულოდნელი, მწვავე გადაცემების გაკეთება შეუძლია. მოურინიოს სქემაში გიულერს ეკისრება არამხოლოდ შემოქმედებითი თავისუფლება, არამედ პასუხისმგებლობა, რომ გუნდს შეტევაში არაპროგნოზირებადობა და სხარტი აზროვნება შემატოს, რაც ნახევარდაცვის სხვა მოთამაშეებს ამ ეტაპზე აშკარად აკლიათ.

იგივე დილემის წინაშე დგას ბერნარდუ სილვაც, რომელიც უჩვეულო პოზიციაზე დადგა და ახლა ცდილობს, გუნდში „ახალი მოდრიჩის“ როლი მოირგოს.

სანამ ნახევარდაცვა თამაშის ორგანიზებას სწავლობს, „რეალის“ მთავარ იარაღად სტანდარტული სიტუაციები და მეორე სართულზე თამაში იქცა, სადაც ცენტრალური ფორვარდის, კარლოს ესპის ფაქტორი გადამწყვეტს ხდის ყოველ ჩაწოდებას. ესპი არამხოლოდ კარგი შემსრულებელია, არამედ გუნდის ნამდვილ გოლეადორად და ჰაერში აბსოლუტურ დომინანტად ყალიბდება. მეტოქის საჯარიმოში მისი აგრესიული და ზუსტი თამაში მძიმე, ჩაკეტილ მატჩებში სამეფო კლუბისთვის ქულების მოპოვების უმთავრეს და ყველაზე ეფექტურ საშუალებად გარდაიქმნა.

მომდევნო ტურებში „ბლანკოსისგან“ უპირველესყოვლისა ტაქტიკური მოქნილობის ზრდას და თამაშის ხარისხობრივ გაუმჯობესებას უნდა ველოდოთ. მოურინიოს მოუწევს ბალანსის პოვნა დაცვით დისციპლინასა და შეტევით პოტენციალს შორის, რათა გუნდი მხოლოდ სტანდარტებსა და ინდივიდუალურ ეპიზოდებს არ იყოს დამოკიდებული. უახლოესი მატჩები აჩვენებს, შეძლებს თუ არა მწვრთნელი ცენტრალური ზონის გადაწყობას ისე, რომ გუნდმა ბურთის ფლობისას მეტი დინამიკა და ეფექტურობა შეიძინოს.

საბოლოო ჯამში, „რეალის“ ახალი კონტურები უკვე საკმაოდ მკაფიოა. ეს არის ფიზიკურად მძლავრი, სტანდარტებში სახიფათო და მოწესრიგებული გუნდი, რომლის მთავარი საყრდენი დაცვაში უშეცდომო თამაშია, ხოლო შეტევის იდეოლოგია არდა გიულერის ინდივიდუალურ ოსტატობაზე და ბერნარდუ სილვას მანევრირებაზე დაფუძნებული სქემებს გულისხმობს. თუ მოურინიო ნახევარდაცვაში კრეატივის დეფიციტის აღმოფხვრას შეძლებს, სამეფო კლუბი მიიღებს იმ პრაგმატულ და ამავდროულად მობილურ მანქანას, რომლის აწყობასაც პორტუგალიელი სპეციალისტი ყოველთვის ცდილობს.