ჟოზე მოურინიოს ვინისიუს ჟუნიორთან კონკრეტული მოთხოვნები იქნება. პორტუგალიელი სპეციალისტის აზრით, ბრაზილიელმა შემტევმა მეტი გოლი უნდა გაიტანოს.

ჟოზე მოურინიოს ყოველთვის გამორჩეული ხედვა ჰქონდა იმ ფეხბურთელების მიმართ, რომელთაც მსოფლიოს მწვერვალზე ასვლა შეუძლიათ. ამჯერად, პორტუგალიელი სპეციალისტის ყურადღების ცენტრში ვინისიუს ჟუნიორი მოექცა, რომლისგანაც მწვრთნელი თამაშის ახალ საფეხურზე აყვანას მოითხოვს. მოურინიოს მთავარი დავალება ბრაზილიელი ვარსკვლავისთვის მარტივი, თუმცა ამბიციურია - მეტი კონცენტრაცია კარის აღებაზე და ალღოს გამახვილება უშუალოდ გოლის გატანაზე. გამოცდილმა სპეციალისტმა იცის, რომ ვინისიუსს აქვს ყველა თვისება, რათა მეტოქის საჯარიმოში ნამდვილ გოლეადორად გარდაიქმნას.

მოურინიოს მიაჩნია, რომ ის სტატისტიკა, რომელსაც ვინისიუსი ამჟამად აფიქსირებს - სეზონში სტაბილური 20-25 გოლი შთამბეჭდავია, თუმცა მისი პოტენციალის გათვალისწინებით მაინც არასაკმარისია. ჟოზეს რწმენით, ბრაზილიელი გარემარბის სისწრაფე, ტექნიკა და დრიბლინგი მას საშუალებას აძლევს, სეზონში ბევრად მეტი გოლი გაიტანოს. ამისათვის საჭიროა აზროვნების მცირედით შეცვლა. ვინისიუსმა ნაკლები უნდა იფიქროს მხოლოდ ფლანგზე ეფექტურ თამაშზე და მთავარ მიზნად მეტოქის კარის მაქსიმალურად ხშირად დალაშქვრა დაისახოს.

ეს დავალება მხოლოს სიტყვებად არ დარჩენილა და „რეალის“ ვარჯიშებზე უკვე აქტიურად გადავიდა პრაქტიკაში. მოურინიოს ხელმძღვანელობით, სამწვრთნელო შტაბი სპეციალურ ტაქტიკურ მონახაზებსა და სავარჯიშო სისტემებს ამუშავებს, სადაც მთავარი აქცენტი ვინისიუსისთვის საგოლე პოზიციების შექმნაზე კეთდება. ვარჯიშებზე განსაკუთრებული ყურადღება ეთმობა შეტევის დაგვირგვინებას, სწრაფ შეტევებში სწორი გადაწყვეტილების მიღებას, მინიმალური შეხებით დარტყმასა და მეკარესთან პირისპირ დარჩენისას ცივსისხლიანობას.

თავის მხრივ, ვინისიუსი ამ გამოწვევას დიდი ენთუზიაზმით შეხვდა და დასახული მიზნის მისაღწევად დაუღალავად შრომობს. ბრაზილიელი ფეხბურთელი ძირითადი ვარჯიშების დასრულების შემდეგაც დიდ დროს უთმობს კარში დარტყმების ტექნიკის დახვეწასა და საჯარიმოში მომენტების რეალიზაციას. ასეთი მონდომება და ტაქტიკური სიახლეები იძლევა იმის იმედს, რომ ვინისიუსი კიდევ უფრო პროდუქტიული გახდება, ხოლო სამეფო კლუბი შეტევაში კიდევ უფრო შეუჩერებელ ძალად გადაიქცევა.