ჟოზე მოურინიომ მადრიდის „რეალს“ მარტინ სუბიმენდის საჭიროებასთან დაკავშირებით დეტალური ხედვა და მონახაზი წარმოუდგინა, რითიც ჩანს სრული არგუმენტაცია, ესპანელი ფეხბურთელის საჭიროების შესახებ.

პორტუგალიელი სპეციალისტის შეფასებით, სან-სებასტიანელი ნახევარმცველი არ არის უბრალოდ მორიგი სამიზნე სატრანსფერო ბაზარზე, არამედ წარმოადგენს იმ ფუნდამენტურ საყრდენს, რომელმაც სამეფო კლუბის ნახევარდაცვის ხაზს სრული ბალანსი და სტრუქტურული სიმტკიცე უნდა შესძინოს. მოურინიოს დოკუმენტში მკაფიოდაა ხაზგასმული, რომ თანამედროვე ფეხბურთში ცენტრალური ზონის მართვა მატჩის ბედს წყვეტს, სუბიმენდი კი სწორედ იმ პროფილის მოთამაშეა, ვისაც „მერენგების“ თამაშში მეტი ბალანსის შეტანა შეუძლია.

მთავარი არგუმენტი, რასაც „განსაკუთრებული“ სუბიმენდის თამაშში გამოყოფს, ესპანელის ფენომენალური მოედნის ხედვა, მაღალი საფეხბურთო ინტელექტი და ტემპის კარნახის უნარია. სუბიმენდის შეუძლია პრესინგის ქვეშ სიმშვიდის შენარჩუნება, ერთი შეხებით ზონების გახსნა და თამაშის რიტმის საჭიროებისამებრ დარეგულირება.  შენელება თუ მოულოდნელი აჩქარება. მისი კრეატიულობა არ გამოიხატება მხოლოდ ეფექტურ პასებში, არამედ სივრცეების სწორ ინტერპრეტაციაში. ამას ემატება ლა ლიგასა და საერთაშორისო ასპარეზზე დაგროვილი უდიდესი გამოცდილება, რაც მას საშუალებას აძლევს, პირველივე დღიდან აიღოს საკუთარ თავზე ლიდერობა და მადრიდული გრანდის შუა ხაზის დირიჟორი გახდეს.

მოურინიოს მონახაზში ცალკე ყურადღება ეთმობა სუბიმენდის კოლაბორაციას „რეალის“ სწრაფ ფლანგის შემტევებთან და აგრესიულ მცველებთან. სუბიმენდის აქვს უნიკალური თვისება, ბურთის ართმევისთანავე ვერტიკალური, ზუსტი გადაცემებით მომენტალურად აამოქმედოს ფლანგები. მისი დიაგონალური პასები და სიღრმიდან შეტევების წამოწყება იდეალურად ერგება მადრიდელთა სწრაფ გარღვევებს, ხოლო დაცვით ფაზაში მისი პოზიციურად უნაკლო თამაში ფლანგის მცველებს საშუალებას აძლევს, უშიშრად ჩაერთონ შეტევებში. სუბიმენდი ქმნის უსაფრთხოების იმ გარანტიას, რომელიც გუნდს პოზიციური სისუსტეების გამოვლენის დროს კონტრშეტევებისგან დააზღვევს.

გარდა ტაქტიკური დეტალებისა, პორტუგალიელი მწვრთნელი განსაკუთრებით უსვამს ხაზს სუბიმენდის ესპანურ იდენტობასა და ლა ლიგის სტილს. ადგილობრივი მაღალი კლასის მოთამაშის დამატება მნიშვნელოვანია კლუბის შიდა ბალანსისთვის, კულტურული უწყვეტობისა და ისეთი ფეხბურთელის ყოლისთვის, ვინც ჩემპიონატის სპეციფიკასა და წნეხს იდეალურად იცნობს. მოურინიოს დასკვნა ერთმნიშვნელოვანია - მარტინი არის არა უბრალოდ გაძლიერება, არამედ „რეალის“ ახალი ტაქტიკური ეპოქის მნიშვნელოვანი ფიგურა, რომელიც გუნდს კიდევ უფრო კრეატიულს და მრავალფეროვანს გახდის.