მადრიდის „რეალის“ კულუარებში ბოლო დროს აქტიურად მსჯელობენ გუნდის ბრაზილიელი ვარსკვლავის, ვინისიუს ჟუნიორის გარშემო შექმნილ სიტუაციასა და ახალი კონტრაქტის თაობაზე მიმდინარე მოლაპარაკებებზე. კლუბის ხელმძღვანელობასა და მმართველ რგოლში სულ უფრო ხშირად ისმის მოსაზრება, რომ ფეხბურთელმა არ უნდა დაივიწყოს ის უდიდესი როლი, რაც სამეფო კლუბმა მის გლობალურ ბრენდად ჩამოყალიბებაში ითამაშა. მადრიდში მიაჩნიათ, რომ სწორედ „ბლანკოსის“ პლატფორმამ, გლობალურმა გავლენამ და მუდმივმა მხარდაჭერამ გახადა ვინისიუსი თანამედროვე ფეხბურთის ერთ-ერთი ყველაზე ცნობადი და ძვირადღირებული სახე, რის გამოც მოთამაშის მხრიდან წამოყენებული ზოგიერთი ახალი პირობა არასამართლიანია.

როდესაც 18 წლის ბრაზილიელი ესპანეთის დედაქალაქში გადმოვიდა, ის მხოლოდ დიდებული ტალანტი იყო, რომელსაც სერიოზული ტაქტიკური და ტექნიკური წუნი ეტყობოდა. „რეალმა“ მასში არამხოლოდ დიდი თანხა გადაიხადა, არამედ ჩადო უზარმაზარი რესურსი, მოთმინება და შრომა. პირველი რთული სეზონების განმავლობაში, როდესაც ფეხბურთელი მედიისა და გულშემატკივრების მხრიდან მწვავე კრიტიკის ქარცეცხლში ეხვეოდა, კლუბის პრეზიდენტმა და სამწვრთნელო შტაბმა მას სრული ნდობა გამოუცხადეს. სწორედ „რეალის“ მაისურით მოგებულმა ჩემპიონთა ლიგის ტიტულებმა და გადამწყვეტ მატჩებში გატანილმა გოლებმა აქცია ვინისიუსი მსოფლიო დონის ფიგურად, რაც პირდაპირ კლუბის დამსახურებაა.

სწორედ ამ ფონის გათვალისწინებით, მადრიდულ გრანდში მიჩნეულია, რომ ახალი კონტრაქტის ფარგლებში ვინისიუსის მხრიდან დამატებითი ასტრონომიული ბონუსების მოთხოვნა სრულიად არარელევანტური და უადგილოა. „რეალში“ თვლიან, რომ ფეხბურთელს უკვე აქვს მსოფლიოში ერთ-ერთი ყველაზე მაღალი და პრივილეგირებული ანაზღაურება, ხოლო კლუბის მიერ შექმნილი გარემო და სპორტული წარმატებები თავისთავად წარმოადგენს იმ უდიდეს ბონუსს, რამაც მას ოქროს ბურთის ნომინანტობამდე და გლობალურ აღიარებამდე მიეყვანა. დამატებითი ფინანსური პრეტენზიები იმ ფონზე, როდესაც კლუბი მას ყოველწლიურად უდიდეს ასპარეზს სთავაზობს, ხელმძღვანელობისთვის მიუღებელია.

ამასთანავე, სამეფო კლუბში მიაჩნიათ, რომ ბრაზილიელის მხრიდან საიმიჯო უფლებების  50%-ზე მეტის მოთხოვნა სრულიად არასამართლიანია. „რეალს“ აქვს ისტორიული და უცვლელი პოლიტიკა, რომელიც ჯერ კიდევ „გალაქტიკოსის“ ერიდან მოდის და საიმიჯო შემოსავლების თანაბარ გადანაწილებას გულისხმობს. კლუბში ხაზგასმით აღნიშნავენ, რომ ვინისიუსის საიმიჯო ღირებულება ასეთ მასშტაბებს ვერასდროს მიაღწევდა, რომ არა „რეალის“ გლობალური მარკეტინგული მანქანა და ლოგო. შესაბამისად, საიმიჯო უფლებების უმეტესი წილის მითვისების მცდელობა იმ ბრენდისგან, რომელმაც ის შექმნა, კლუბის ინტერესების იგნორირებად აღიქმება.

საბოლოო ჯამში, მადრიდული მხარის პოზიცია მყარი და არგუმენტირებულია. „რეალი“ ყოველთვის მაღლა დგას ნებისმიერ ინდივიდუალურ მოთამაშეზე. კლუბში იმედოვნებენ, რომ ვინისიუსი და მისი გარემოცვა გონს მოეგებიან, სწორად შეაფასებენ იმ პრივილეგიას, რასაც სამეფო კლუბის ღირსების დაცვა ჰქვია, და უარს იტყვიან გადაჭარბებულ ფინანსურ პრეტენზიებზე. წინააღმდეგ შემთხვევაში, „ბლანკოსი“ არ აპირებს საკუთარი პრინციპებისა და ფინანსური იერარქიის დარღვევას, რადგან ისტორიამ არაერთხელ დაამტკიცა, რომ „რეალი“ ვარსკვლავებს ქმნის და არა პირიქით.