საპრეზიდენტო არჩევნებთან დაკავშირებით, მადრიდის რეალი ოფიციალურ განცხადებას ავრცელებს.

საარჩევნო კომისია, საზოგადოების წესდებით, საარჩევნო დებულებითა და საოპერაციო განვითარების შეთანხმებით (დანართი II) მისთვის მინიჭებული საარჩევნო პროცესის ზედამხედველობის, კონტროლისა და გარანტირების ფუნქციების შესაბამისად, კანონიერად წარდგენილ კანდიდატებს აცნობებს შემდეგს:

ამავე მიზნით გამოყოფილი №6031 საფოსტო ყუთიდან ფოსტით მიღებული ხმების გამოტანის, აგრეთვე საარჩევნო დებულებითა და II დანართით გათვალისწინებული მიღების, დოკუმენტირების, დალუქვის, ტრანსპორტირებისა და შენახვის პროცედურების განხორციელების მიზნით, მოწვეულია თითოეული იმ კანდიდატის მიერ კანონიერად აკრედიტებული თითო (1) დამკვირვებელი (ინტერვენტორი), რომელსაც აღნიშნულ პროცედურებზე დასწრება სურს.
დამკვირვებლები უნდა გამოცხადდნენ 2026 წლის 4 ივნისს, 13:45 საათზე, საარჩევნო კომისიის ოფისში, რომელიც მდებარეობს „სიუდად რეალ მადრიდში“ (Ciudad Real Madrid).

14:00 საათზე აღნიშნული ოფისიდან გავა სატრანსპორტო საშუალება, რომელიც დამსწრე პირებს გადაიყვანს იმ საფოსტო განყოფილებაში, სადაც მდებარეობს №6031 საფოსტო ყუთი. ამ დროის შემდეგ გამოცხადებული პირების მონაწილეობა ვერ იქნება უზრუნველყოფილი. შესაბამისად, გთხოვთ, დაიცვათ მაქსიმალური პუნქტუალურობა.

დაგეგმილი პროცედურები წარიმართება შემდეგი წესით:
1 საფოსტო განყოფილებაში გამგზავრებამდე, კლუბის ნოტარიუსი შესაბამისი ოქმით ან დასწრების აქტით დააფიქსირებს პროცედურების დაწყების თარიღს, დროსა და ადგილს, აგრეთვე საარჩევნო კომისიის წევრებისა და პროცედურებზე დასასწრებად გამოცხადებული კანდიდატების დამკვირვებელთა ვინაობას.

2 კლუბის ნოტარიუსი, ბატონი კრუს გონსალო ლოპეს-მიულერ გომესი (D. Cruz Gonzalo López-Müller Gómez) ან, საჭიროების შემთხვევაში, მისი კანონიერი შემცვლელი, №6031 საფოსტო ყუთიდან გამოიღებს საარჩევნო კორესპონდენციას.
3 ფოსტით მოსული ხმები მოთავსდება საამისოდ განკუთვნილ კონტეინერებში, რომლებიც დაილუქება საარჩევნო დებულებითა და II დანართით გათვალისწინებული წესით.

4 ნოტარიუსი შეადგენს შესაბამის სანოტარო აქტებს ან დასწრების ოქმებს, რომლებიც ეხება მიღებას, მიღებული საარჩევნო დოკუმენტაციის გამოტანასა და დალუქვას.
5 ყველა ზემოაღნიშნული მოქმედება განხორციელდება საარჩევნო კომისიის დამსწრე წევრებისა და კანდიდატების გამოცხადებული დამკვირვებლების თანდასწრებით.

6 აღნიშნული პროცედურების დასრულების შემდეგ, საარჩევნო დოკუმენტაცია საფოსტო განყოფილებიდან გადაიგზავნება საარჩევნო კომისიის შტაბ-ბინაში („სიუდად რეალ მადრიდში“). ნოტარიუსი, საარჩევნო კომისიის დამსწრე წევრები და დამკვირვებლები ერთად იმგზავრებენ ერთი და იმავე სატრანსპორტო საშუალებით.

7 საარჩევნო კომისიის შტაბ-ბინაში მიტანისას, დალუქული კონტეინერები შესანახად განთავსდება საამისოდ გამოყოფილ ოთახში კლუბის ნოტარიუსის, საარჩევნო კომისიის დამსწრე წევრებისა და აღნიშნულ პროცედურებზე გამოცხადებული დამკვირვებლების თანდასწრებით. 

ნოტარიუსი აღნიშნულ განთავსებას დაადასტურებს შესაბამისი სანოტარო აქტით ან დასწრების ოქმით. ამის შემდეგ, კონტეინერები დარჩება ხსენებულ დაკეტილ ოთახში, მეთვალყურეობის ქვეშ, საარჩევნო დებულებითა და II დანართით გათვალისწინებული პირობებით.
დამსწრე პირებს შეეძლებათ შეამოწმონ კონტეინერებისა და მათი ლუქების მთლიანობა საცავ ოთახში მათი განთავსების მომენტში.

აღნიშნული ოთახი იქნება დაკეტილი და მას 24 საათის განმავლობაში უწყვეტად გააკონტროლებს კლუბის უსაფრთხოების სამსახური. გარდა ამისა, საარჩევნო დოკუმენტაციის შენახვის მთელი პერიოდის განმავლობაში ოთახი აღიჭურვება მუდმივმოქმედი ვიდეომეთვალყურეობის სისტემით.

ფოსტით მიცემული ხმების შენახვის პროცედურის გამჭვირვალობისა და მისადმი ნდობის ამაღლების მიზნით, კანდიდატებს, რომლებიც ამას მოითხოვენ, შეუძლიათ დანიშნონ თავიანთი ერთ-ერთი კანონიერად აკრედიტებული დამკვირვებელი, რომელიც უწყვეტად იმყოფება საცავი ზონის შესასვლელთან მთელი იმ პერიოდის განმავლობაში, სანამ ფოსტით მიღებული ხმები იქ იქნება განთავსებული.

აღნიშნულ დასწრებას ექნება ექსკლუზიურად სადამკვირვებლო ხასიათი და იგი არ ითვალისწინებს საარჩევნო დოკუმენტაციის, კონტეინერების, ლუქების ან ფოსტით მიღებული ხმების შენახვის, კონტროლის, მათზე წვდომის ან მათში ჩარევის უფლებამოსილებას. ამასთანავე, დამკვირვებლებს არ ექნებათ უფლება შევიდნენ საცავ ოთახში ან წვდომა ჰქონდეთ მის შიგთავსზე, გარდა საარჩევნო დებულებითა და II დანართით პირდაპირ გათვალისწინებული შემთხვევებისა და პროცედურებისა, ან როდესაც ამას დაადგენს საარჩევნო კომისია კლუბის ნოტარიუსის თანდასწრებით, საჭიროებისამებრ.

აღნიშნულ ზონაში დამკვირვებელთა ყოფნა განიხილება კლუბის ტერიტორიაზე არსებული დაცვისა და უსაფრთხოების სისტემების მოქმედების სივრცეში ყოფნად და მასზე გავრცელდება მოქმედი ვიდეომეთვალყურეობის რეჟიმი და გამოსახულების დამუშავების წესები, მოქმედი კანონმდებლობის შესაბამისად.
ორგანიზაციული მიზნებისთვის, გთხოვთ კანდიდატებს, რაც შეიძლება მალე შეატყობინოთ კომისიას:

ა) დაესწრებით თუ არა ზემოთ აღწერილ პროცედურებს.
ბ) იმ დამკვირვებლის ვინაობა, რომელიც გამოცხადდება კანდიდატის სახელით.
გ) აღნიშნული დამკვირვებლის მობილური ტელეფონის ნომერი, მხოლოდ და მხოლოდ მასთან დაკავშირების მიზნით, დაგეგმილი პროცედურების მიმდინარეობისას რაიმე გაუგებრობის ან ინციდენტის წარმოშობის შემთხვევაში.

ერთი ან ორივე კანდიდატის დამკვირვებელთა გამოუცხადებლობა ხელს არ შეუშლის და არ შეაჩერებს დაგეგმილი პროცედურების განხორციელებას.