მადრიდული გუნდი მნიშვნელოვან განცხადებას ავრცელებს.

საპრეზიდენტო კანდიდატ ენრიკე რიკელმეს განცხადებების საპასუხოდ, რომლებშიც იგი ამტკიცებს, რომ კლუბის წევრთა სიაზე წვდომა მხოლოდ ერთ-ერთ კანდიდატს აქვს, აგრეთვე ფოსტით მიცემული ხმების უსაფრთხოებასთან დაკავშირებით გამოთქმული ეჭვებისა და უნდობლობის გამო, საარჩევნო კომისია აცხადებს შემდეგს:

1. საარჩევნო კომისიას 7 ივნისის არჩევნებში მონაწილე არცერთი კანდიდატისთვის არ გადაუცია წევრთა სია.

2. საარჩევნო კომისიამ წერილობითი ფორმით მიაწოდა ინფორმაცია ორივე კანდიდატს კლუბის წევრებისთვის ინფორმაციის, დოკუმენტაციისა და მასალების გაგზავნის პროცედურის შესახებ. გარდა ამისა, კანდიდატ ენრიკე რიკელმეს აღნიშნული პროცედურის შესახებ პერსონალურად ეცნობა მისი კანდიდატურის წარდგენის დღეს.

3. ეს პროცედურა გათვალისწინებულია საარჩევნო პროცესის მარეგულირებელ დებულებაში (წევრთა სიის შესახებ განაყოფის მე-2 პუნქტი), რომელიც სწორედ ამ მიზნით გამოქვეყნდა. წესების თანახმად, კანდიდატებმა საარჩევნო კომისიას უნდა წარუდგინონ ის ინფორმაცია, დოკუმენტაცია და მასალები, რომელთა გაგზავნაც სურთ წევრებისთვის, ხოლო მათ გავრცელებაზე პასუხისმგებელია კლუბი.

4. საარჩევნო კომისიამ ორშაბათი, 1 ივნისი, 18:00 საათი დაადგინა იმ ინფორმაციის, დოკუმენტაციისა და მასალების მიღების ბოლო ვადად, რომელთა გაგზავნაც თითოეულ კანდიდატს სურდა წევრებისთვის.

5. საარჩევნო კომისია ღრმა შეშფოთებას გამოთქვამს ენრიკე რიკელმეს განცხადებების გამო, რომლებიც ეჭვქვეშ აყენებს ფოსტით მიცემული ხმების შენახვის საიმედოობასა და უსაფრთხოებას. რიკელმეს საარჩევნო შტაბის მიერ ამ საკითხზე დასმული კითხვის საპასუხოდ, საარჩევნო კომისიამ გასცა წერილობითი პასუხი, საიდანაც მოგვაქვს შემდეგი ამონარიდი:

გამჭვირვალობის გაზრდისა და ფოსტით მიცემული ხმების შენახვის პროცედურის ხელშეუხებლობისადმი ნდობის განმტკიცების მიზნით, კანდიდატებს, რომლებიც ამას მოითხოვენ, შეუძლიათ დანიშნონ სათანადო აკრედიტაციის მქონე ერთ-ერთი დამკვირვებელი, რომელიც მუდმივად იმყოფებოდეს ხმების შესანახად გამოყოფილი ოთახის შესასვლელის სიახლოვეს.

აღნიშნულ ტერიტორიაზე დამკვირვებლების ყოფნა განიხილება კლუბის ობიექტებზე არსებული დაცვისა და უსაფრთხოების სისტემების ფარგლებში და დაექვემდებარება ვიდეომეთვალყურეობის მოქმედ წესებსა და გამოსახულების დამუშავების პროცედურებს, შესაბამისი კანონმდებლობის თანახმად.

1. შესაბამისად, ნებისმიერი ინფორმაცია, დოკუმენტაცია თუ მასალა, რომელიც რომელიმე კანდიდატისგან კლუბის წევრებს მიუვიდათ, დამუშავდა მოქმედი პროცედურებისა და რეგულაციების სრული დაცვით.

2.საარჩევნო კომისია მკაცრად და ზედმიწევნით მისდევს წინამდებარე საარჩევნო პროცესის მიმართ მოქმედ რეგულაციებს და, შესაბამისად, მოითხოვს ამ პროცესისადმი პატივისცემას.