ალვარო არბელოამ „ალავესთან“ დაპირისპირების წინ პრესკონფერენცია გამართა.

„ვაპირებთ ვაჩვენოთ ჩვენი ამბიცია, ვითამაშოთ კარგი თამაში და აუცილებლად გავიმარჯვოთ. ის, რომ მცირე შანსი გვაქვს, არაფერს ცვლის. მოტივაცია აუცილებელია და ყველაფერს გავაკეთებთ, ყველა მატჩის მოსაგებად.“

„ზედიზედ 2 წელი ტიტულის გარეშე? „ბლანკოსის“ კალიბრის გუნდისთვის ეს ძალიან ცუდი მაჩვენებელია. არ არსებობს საბაბი იმისა, რომ  ოპტიმიზმი არ შევინარჩუნოთ. გუნდი დაკომპლექტებულია უმაღლესი კლასის ფეხბურთელებით, რომელთა რესურსიც აუცილებლად გამოიღებს შედეგს.“

„ჩემს მომავალზე არ ვნერვიულობ, ეს ახლა არ არის გადამწყვეტი. თუ დავრჩები, ერთგულად ვემსახურები კლუბს, თუ წავალ, ახალ სპეციალისტს წარმატებას ვუსურვებ.“

„სამომავლო თემები კლუბის მენეჯმენტს უკავშირდება და არა მე.“

„გუნდს ნამდვილად აქვს გაუმჯობესების სივრცე. შესაძლოა შედეგები იდეალური არ არის, მაგრამ ფაქტია, რომ პერსპექტივა არსებობს. მადრიდის „რეალი“ აუცილებლად დაბრუნდება მწვერვალზე.“

„კარვახალი, ვალვერდე, ვინი, მბაპე და სხვები ლიდერის სულს ფლობენ. მათი გავლენა გუნდზე ძალიან მნიშვნელოვანი და პოზიტიურია.“

„არამგონია ბერნაბეუზე შეკრებილმა პუბლიკამ დაგვისტვინოს. ყველამ იხილა, როგორ იბრძოლა გუნდმა „ალიანც არენაზე“ და რა შედეგები აჩვენა განსაკუთრებით პირველ ტაიმში.“

„ყოველთვის ვამბობ იმას, რასაც ვფიქრობ. ვცდილობ, გასახდელში მეგობრული სიტუაცია ჩამოვაყალიბო. თუ რამე არ მოგვწონს, ჩვენ ამას ღიად გამოვხატავთ და ვმსჯელობთ. სწორედ დისკუსიაში იბადება ჭეშმარიტება.“

„კამავინგამ ძალიან განიცადა გერმანიაში მომხდარი ფაქტი. ჩვენ ფრანგს მაქსიმალური მხარდაჭერა გამოვუცხადეთ. რა თქმა უნდა, ეს არ შედიოდა ედუს გეგმებში.“

„აუცილებლად უნდა დავიმსახუროთ ოვაცია, ამიტომ საკუთარი გულშემატკივრების წინ სანახაობრივი ფეხბურთის ჩვენება გვმართებს.“

„არდა გიულერი ბრწყინვალე მოთამაშეა. ახალგაზრდამ არაერთხელ დაადასტურა, რომ უმაღლესი დონის მატჩებში ლიდერის ფუნქციის შესრულება შეუძლია. მერწმუნეთ, არდა კიდევ მოუმატებს და ეჭვი არ მეპარება, მივა იმ კონდიციამდე, როდესაც მთელი მსოფლიო აღიარებს. მისი მანევრირება, ბურთის ფლობის უნარი და დარტყმა თვალშისაცემია.“

„შუა სეზონში მოსვლა? ეს რა თქმა უნდა, ძალიან რთული ამოცანაა, მაგრამ მერწმუნეთ, ჩემთვის „რეალში“ დანიშვნა დიდი პატივი იყო.“

„მბაპემ „ბაიერნის“ წინააღმდეგ დიდი ეფექტი აჩვენა, ყველგან მოძრაობდა და გოლის გატანაც შეძლო. კილიანის გოლების რაოდენობა ყველაფერზე მეტყველებს.“