ლუიშ ფიგუმ მიუნხენის „ბაიერნის“ და „რეალის“ დაპირისპირებასთან დაკავშირებით ვრცელი და მრავლისმომცელი ინტერვიუ ჩაწერა.

„პირველ შეხვედრაში 1-2 დამარცხება, რა თქმა უნდა, არ არის სასურველი სტარტი, მაგრამ მოდით ვიყოთ რეალისტები. ეს მადრიდის რეალია. ჩვენს ისტორიაში არაერთი შემთხვევა ყოფილა, როდესაც კედელთან მიმწყვდეულებს უფრო მეტი ძალა გვიპოვია. ბაიერნმა მოიპოვა უპირატესობა, თუმცა მათაც კარგად იციან, რომ მადრიდული გენის წინააღმდეგ 90 წუთი ძალიან დიდი დროა. მთავარია, გუნდმა მიუნხენში პირველივე წუთებიდანვე აჩვენოს, რომ სტუმრად მოსაგებად ჩავიდა და არა მხოლოდ სათამაშოდ.

 „როდესაც ჩემპიონთა ლიგის ჰიმნი ისმის, რეალის ფეხბურთელები სრულიად სხვა განზომილებაში გადადიან. ეს არის ტურნირი, სადაც გამოცდილება ხშირად უფრო მეტს ნიშნავს, ვიდრე ტაქტიკური სქემები. ბევრს ჰგონია, რომ ბაიერნის ფორმა ამ მომენტში უკეთესია, მაგრამ ასეთ კრიტიკულ მატჩებში მადრიდელების უნარი - შეინარჩუნონ სიმშვიდე ყველაზე რთულ მომენტებში  გადამწყვეტი იქნება. ჩვენ ვიცით, როგორ მოვიგოთ მაშინაც კი, როცა ფავორიტებად არ ვითვლებით.“

 „მიუნხენში თამაში ყოველთვის რთულია, ატმოსფერო საოცარია, თუმცა რეალისთვის ეს მხოლოდ დამატებითი მოტივაციაა. „რეკორდმაისტერი“ შეეცდება თამაში გააკონტროლოს, მაგრამ სწორედ აქ უნდა გამოჩნდეს „ბლანკოსის“ კონტრშეტევების ძალა. მადრიდს აქვს უნიკალური თვისება. მათ შეუძლიათ გაუძლონ მეტოქის შტურმს 20 წუთი და შემდეგ ერთი ეპიზოდით სრულიად შეცვალონ თამაშის ბედი. ეს არის ის, რაც ამ კლუბს სხვა ყველასგან გამოარჩევს.“

„ამ შეხვედრაში ბევრი რამ იქნება დამოკიდებული ლიდერებზე. გამოვყოფდი რამდენიმე ფეხბურთელს, რომელთაც მატჩის ბედის გადაწყვეტა შეუძლიათ. პირველ რიგში, ეს არის ნახევარდაცვის ცენტრი. იქ, სადაც თამაშის რიტმი იქმნება. ჩვენ გვჭირდება მაქსიმალური კონცენტრაცია და ბურთის ფლობისას ცივი გონება. თუ ცენტრს მოვიგებთ, ბაიერნს ძალიან გაუჭირდება თავისი თამაშის თავზე მოხვევა.“

 „განსაკუთრებულ იმედებს ვამყარებ შემტევებზე. მათ აქვთ სისწრაფე და დრიბლინგი, რაც გერმანელთა მცველებს პრობლემებს შეუქმნის. ასეთ დონეზე მცირე შეცდომაც კი ისჯება. ჩვენ გვჭირდება ფეხბურთელები, რომლებსაც შეუძლიათ 1-1-ზე მეტოქის მოტყუება და სივრცეების შექმნა. სწორედ ინდივიდუალური ბრწყინვალებაა ის, რაც ხშირად ხურავს ჩაკეტილ მატჩებს 1/4 ფინალებში.“

 „ბევრს უკვირს, როგორ ახერხებს სამეფო კლუბი ბოლო წუთებზე გადარჩენას. ეს შემთხვევითობა არაა, ეს არის რწმენა საკუთარი თავის. როდესაც აგებ, სხვა გუნდები პანიკაში ვარდებიან, მადრიდი კი პირიქით, უფრო აგრესიული და მიზანმიმართული ხდება. მიუნხენში ჩვენ აუცილებლად დაგვჭირდება ეს საფეხბურთო გამბედაობა. თუ გაგვიჭირდა, სწორედ ეს ხასიათი უნდა გახდეს ჩვენი მთავარი დასაყრდენი.“

 „მიუხედავად იმისა, რომ გოლები გვჭირდება, დაცვაში იდეალურები უნდა ვიყოთ. ბაიერნს ჰყავს შემსრულებლები, რომლებსაც ნახევარი მომენტიდან გატანა შეუძლიათ. ამიტომ, გადასვლები შეტევიდან დაცვაში უნდა იყოს ელვისებური. მცველებისგან ვიხილავდი მაქსიმალურ კომუნიკაციას. თუ უკანა ხაზი სიმყარეს შეინარჩუნებს, შეტევაში თავისუფლების მეტი ხარისხი გვექნება.“

„ჩემპიონთა ლიგა არ არის მხოლოდ ფიზიკური მომზადება, ეს არის გონებრივი ომი. ალვარო არბელოამ იცის, როგორ მიუდგეს ფეხბურთელებს. გასახდელში უნდა სუფევდეს განწყობა, რომ მიუნხენში ჩვენი ისტორიის მორიგი ფურცელი უნდა დაიწეროს. ფეხბურთელებს თვალებში უნდა ეხატოთ გამარჯვების წყურვილი. რეალის მაისური თავისთავად დიდი პასუხისმგებლობაა, მაგრამ ასეთ მატჩებში ის დამატებით ფრთებს გასხამს.“

 „ჩვენ ვიცით, რამდენად მნიშვნელოვანია ეს მატჩი მილიონობით მადრიდისტასთვის. მიუხედავად იმისა, რომ სტუმრად ვთამაშობთ, გუნდი იგრძნობს იმ მხარდაჭერას, რომელიც მადრიდიდან მოდის. რეალი არასდროს ნებდება და ეს არის ის მთავარი გზავნილი, რაც გუნდმა მოედანზე გასვლისას უნდა გაითავისოს. ჩვენ მივდივართ საბრძოლველად და მოსაგებად.“

„რთული იქნება, ალბათ ერთ-ერთი ყველაზე მძიმე მატჩი სეზონში. თუმცა, თუ მკითხავთ, ვის აქვს მეტი შანსი ასეთ დრამატულ სცენარში, ყოველთვის ვიტყვი  „რეალს“. ჩემი პროგნოზია, რომ მადრიდი მოახერხებს თამაშის შემობრუნებას. ჩვენ გვაქვს კლასი, გვაქვს ისტორია და რაც მთავარია, გვაქვს გამარჯვებულის მენტალიტეტი. ველი დიდებულ საფეხბურთო საღამოს, სადაც „თეთრები“ კიდევ ერთხელ დაამტკიცებენ თავის უპირატესობას ევროპაში.

„მიუნხენში მივემგზავრები, ასეთი თამაშის გამოტოვება ნამდვილად არ მსურს. იმედი მაქვს, საფინალო სასტვენის შემდეგ ბედნიერი ვიქნები და სამეფო კლუბს ჩემპიონთა ლიგის 1/2 ფინალში გასვლას მივულოცავ.“