ტონი კროოსმა „რეალისა“ და „ბაიერნის“ დაპირისპირებაზე ძალიან საინტერესო განცხადებები გააკეთა.

„როდესაც წილისყრამ რეალი და ბაიერნი კვლავ შეახვედრა ერთმანეთს, პირველი, რაც ვიგრძენი, უდიდესი პატივისცემაა. ეს ორი კლუბი ჩემს ცხოვრებაში ყველაფერს ნიშნავს. საუბარია ორ გიგანტზე, რომელთაც საკუთარი, უნიკალური ხელწერა აქვთ ევროსარბიელზე. მათი ტრადიციები და ისტორია იმდენად ღრმაა, რომ ეს მატჩი ნებისმიერ ტურნირს დაამშვენებდა, მით უმეტეს ჩემპიონთა ლიგის მეოთხედფინალს.“

„ბაიერნი არის გუნდი, რომელმაც მასწავლა, რას ნიშნავს პროფესიონალიზმი და გამარჯვებულის მენტალიტეტი. მათ აქვთ საოცარი სტრუქტურა და ყოველთვის ფლობენ საკუთარ ნიშანს - ეს არის აგრესიული, დომინანტური ფეხბურთი. რეალი კი ჩემთვის სახლია, სადაც ევროპული დიდება ჩვეულებრივი მოვლენაა. ორივე კლუბს აქვს ის შინაგანი რწმენა, რომ ჩემპიონთა ლიგა მათი ტურნირია, რაც ამ დაპირისპირებას ფსიქოლოგიურად უმძიმესს ხდის.“

„თუ გუნდების ძლიერ მხარეებს შევაფასებთ, ბაიერნის პლუსი მათი გუნდური შეკრულობა და ტაქტიკური დისციპლინაა. მათ შეუძლიათ ნებისმიერ მეტოქეს თავს მოახვიონ თავიანთი რიტმი. თუმცა, მათი სუსტი წერტილი შესაძლოა მაღალი დაცვის ხაზი აღმოჩნდეს, რაც რეალის მსგავსი სწრაფი გუნდის წინააღმდეგ ყოველთვის დიდ რისკთან არის დაკავშირებული.“

„რაც შეეხება რეალს, გუნდის უდიდესი კოზირი გამოცდილება და ინდივიდუალური შემსრულებლების დონეა. გუნდმა იცის, როგორ მოიგოსთამაშები მაშინაც კი, როცა სრულ უპირატესობას არ ფლობს. უარყოფით მხარედ შესაძლოა ჩაითვალოს ის მომენტები, როდესაც გუნდი მეტისმეტად ეყრდნობა ინტუიციას და ტაქტიკური სიმკაცრე მეორე პლანზე გადადის, რაც ბაიერნის სტილის მანქანასთან სახიფათოა.“

„დაცვით კომპონენტს ამ მატჩში ფუნდამენტური მნიშვნელობა ექნება. ორივე გუნდს უყვარს შეტევა, მაგრამ ვინც უფრო ნაკლებ შეცდომას დაუშვებს საკუთარ საჯარიმოსთან, ის გავა შემდეგ ეტაპზე. ცენტრალურმა მცველებმა იდეალურად უნდა წაიკითხონ თამაში, რათა არ დატოვონ სივრცეები ზურგს უკან, რადგან ასეთ დონეზე ერთი არასწორი ნაბიჯიც კი საბედისწეროა.“

„განსაკუთრებული ყურადღება უნდა გამახვილდეს შეტევების ფლანგებიდან ორგანიზებაზე. ბაიერნს ჰყავს ფეთქებადი ვინგერები, რომლებიც ხაზს შესანიშნავად ჭრიან. რეალმა კი უნდა გამოიყენოს თავისი ფლანგური სისწრაფე, რათა მეტოქის დაცვა გაწელოს. სწორედ ფლანგებზე მოპოვებული უპირატესობა იქნება ის გასაღები, რომლითაც ცენტრში თავისუფალი ზონები შეიქმნება.“

„შანსებს თუ გადავხედავთ, ვფიქრობ, 50/50-ზეა. ბევრი რამ იქნება დამოკიდებულ იმაზე, თუ ვინ უფრო უკეთ მართავს ემოციებს. ასეთ მატჩებში ფავორიტი არ არსებობს. დეტალებმა - ერთმა ზუსტმა პასმა, სტანდარტულმა სიტუაციამ ან თუნდაც მეკარის ერთმა „სეივმა“ - შეიძლება მთელი სერიის ბედი გადაწყვიტოს. აქ წვრილმანები არ არსებობს, ყველაფერი მნიშვნელოვანია.“

„საინტერესო დეტალია ისიც, თუ როგორ მოახდენენ გუნდები პრესინგის ადაპტირებას. ბაიერნი შეეცდება მაღალ პრესინგს, რათა „ბლანკოსს“ ბურთის ამოტანა გაუჭირდეს.  „მერენგების“ ამოცანა კი იქნება, რომ ეს წნეხი ცივსისხლიანად დაიძლიოს. ჩემპიონთა ლიგაზე ხშირად ის იგებს, ვინც ბურთთან ერთად უფრო მშვიდად არის ყველაზე დიდი წნეხის დროს.“

„მატჩის ისტორიულობა კიდევ ერთხელ შეგვახსენებს, რატომ არის ფეხბურთი საუკეთესო თამაში. ეს არ არის უბრალოდ ტაქტიკა, ეს არის ხასიათების ბრძოლა. ბერნაბეუსა და ალიანც არენას ატმოსფერო მატჩს დამატებით დრამატიზმს სძენს. ყოველი წუთი იქნება დაძაბული, რადგან მოედანზე ერთმანეთს ევროპის მბრძანებლები ხვდებიან.“

„გულშემატკივარს ნამდვილი საფეხბურთო ზეიმი ელოდება. მე, როგორც ყოფილ ფეხბურთელს, ასეთი მატჩების ყურება ძალიან მსიამოვნებს. მოედანზე მეგობრობა გვერდზე დარჩება და ბრძოლა მხოლოდ გამარჯვებისთვის შედგება, თუმცა მატჩის შემდეგ მთავარი გმირები  უდიდესი პატივისცემით დაემშვიდობებიან ერთმანეთს, რადგან ეს კლუბები ამას იმსახურებენ.“

„დავესწრები თუ არა 1/4 ფინალს? დიახ, ვაპირებ, რომ მოედანზე მივიდე და სიამოვნება მივიღო.“