ზინედინ ზიდანი „რეალის“ და მანჩესტერ „სიტის“ დაპირისპირებას ესწრებოდა. ფრანგმა ლეგენდამ შეხვედრის შემდეგ მედიის წარმომადგენლებთან ისაუბრა.

„ეს ნამდვილი ჯადოქრობა იყო, რაც დღეს სანტიაგო ბერნაბეუზე ვიხილეთ. მიუხედავად იმისა, რომ გუნდს უამრავი საკადრო პრობლემა ჰქონდა და ბევრი ფავორიტად მეტოქეს მიიჩნევდა, მადრიდის „რეალმა“ კიდევ ერთხელ დაამტკიცა, რომ ჩემპიონთა ლიგა მისი ტურნირია. ასეთ მომენტებში კლუბის „დნმ“იღვიძებს და ფეხბურთელები მოედანზე მაქსიმუმს დებენ. 3:0 ასეთ ძლიერ მეტოქესთან ყოველთვის შთამბეჭდავია, მაგრამ დღევანდელი გამარჯვება განსაკუთრებული ემოციითა და ხასიათით იყო გაჯერებული.“

„რაც შეეხება ფედერიკო ვალვერდეს, სიტყვები არ მყოფნის მისი გამოსვლის შესაფასებლად. ის, რაც მან დღეს მოედანზე გააკეთა, უბრალოდ არანორმალურია. ფედე ყოველთვის იყო გუნდის გული,  მაგრამ დღევანდელმა ჰეთ-თრიკმა ის სულ სხვა დონეზე აიყვანა. მისი ენერგია, დისციპლინა და მომენტების რეალიზაცია იყო ის, რამაც „მანჩესტერ სიტის“ თავდაცვა სრულად მოშალა. ის ნამდვილი ლიდერია, რომელიც გუნდს მაშინ გაუძღვა, როცა ეს ყველაზე მეტად სჭირდებოდა.“

„ვალვერდეს თამაშში ყველაზე მეტად მისი უნივერსალურობა მხიბლავს. ის არამხოლოდ სამ გოლს იტანს, არამედ მთელ მოედანს აკონტროლებს, იბრძვის დაცვაში, გადააქვს ბურთი შეტევაში და არასდროს იღლება. მისი პროგრესი ფენომენალურია. დღეს მან დაამტკიცა, რომ მსოფლიოს ერთ-ერთი საუკეთესო ნახევარმცველია. ასეთი ტიპის ფეხბურთელი ყველა მწვრთნელის ოცნებაა, რადგან მას შეუძლია მატჩის ბედი მარტომ გადაწყვიტოს, ისე როგორც ეს დღეს ვიხილეთ.“

„მინდა მივულოცო ალვარო არბელოას და მთელ სამწვრთნელო შტაბს. ასეთ რთულ ვითარებაში გუნდის ასე მომზადება დიდ პროფესიონალიზმზე მეტყველებს. „რეალმა“ აჩვენა, რომ მათთვის შეუძლებელი არაფერია და ეს გამარჯვება გულშემატკივრებისთვის დიდი საჩუქარია. წინ კიდევ დიდი ბრძოლაა, თუმცა ამგვარი განწყობითა და ვალვერდესნაირი ფორმით, მადრიდს წელსაც ყველაფრის მოგება შეუძლია. მე ყოველთვის ამ გუნდის გვერდით ვარ და ვამაყობ იმით, რაც დღეს ვიხილე.“