დღეს მადრიდის „რეალის“ პრეზიდენტის, ფლორენტინო პერესის დაბადების დღეა.

ესპანელი ლეგენდარული მმართველი 79 წლის გახდა.

ყველა თანხმდება, რომ პერესი არის ისტორიული პრეზიდენტი, რომლის მმართველობის დროსაც „ბლანკოსმა“ როგორც სპორტულ, ასევე ინსტიტუციურ დონეზე უდიდეს წარმატებას მიაღწია.

სპორტული მენეჯმენტის გარდა, პერესის უდიდესი მემკვიდრეობა ინფრასტრუქტურულ მოდერნიზაციასა და მომავლის ხედვაში მდგომარეობს. სანტიაგო ბერნაბეუს გრანდიოზული რეკონსტრუქცია, რომელიც სტადიონს მულტიფუნქციურ ტექნოლოგიურ ცენტრად აქცევს, მისი ამბიციების კულმინაციაა, მიზანი კლუბისთვის შემოსავლების ახალი, მუდმივი წყაროს გაჩენა გახლავთ.

ამასთანავე, ფლორენტინომ შეცვალა სატრანსფერო პოლიტიკა - მზა ვარსკვლავების ყიდვიდან გადავიდა მსოფლიოს საუკეთესო ახალგაზრდა ტალანტების ადრეულ ეტაპზე მოძიებასა და აღზრდაზე, რითაც გუნდის გრძელვადიანი დომინაცია უზრუნველყო. პერესი დღეს აღიქმება არამხოლოდ პრეზიდენტად, არამედ თანამედროვე „რეალის“ არქიტექტორად, რომელმაც სანტიაგო ბერნაბეუს მიერ დატოვებული სტანდარტები 21-ე საუკუნის მოთხოვნებს მოარგო და კლუბს „საუკუნის საუკეთესოს“ სტატუსი შეუნარჩუნა.

ვულოცავთ პრესის და წარმატებებს ვუსურვებთ, როგორც კარიერაში, ასევე პირად ცხოვრებაში!