დღეს საღამოს, ლა ლიგის 24-ე ტურის ფარგლებში, პამპლონას „ელ სადარი“ ნამდვილ საფეხბურთო ბატალიას უმასპინძლებს. ტურნირის ამ ფაზაში, როდესაც ჩემპიონთა ლიგის პლეი-ოფებიც ახლოვდება, მადრიდის „რეალი“ ესპანეთის ჩემპიონატში ერთპიროვნულად გალიდერდა. ალვარო არბელოას გაწვრთნილი გუნდი საოცარ ფორმაშია და ზედიზედ მოგებები აქვს აქტივში. მეორე მხრივ, „ოსასუნა“ ცხრილის შუაში, მე-10 პოზიციაზეა გამაგრებული. მასპინძლები არც ევროთასების ზონასთან არიან ახლოს და არც გავარდნა ემუქრებათ, რაც მათ საშუალებას აძლევს, ყოველგვარი წნეხის გარეშე, მაქსიმალური აგრესიით დაუპირისპირდნენ სამეფო კლუბს.

ისტორიულად, „ელ სადარი“ მადრიდელებისთვის ერთ-ერთი ყველაზე უსიამოვნო გასვლაა. მიუხედავად იმისა, რომ ბოლო წლებში „ბლანკოსს“ აქ წაგება არ ახსოვს, ბოლო სამი ვიზიტიდან ორჯერ პამპლონელებმა მადრიდელებს ქულები გამოსტყუეს.  „ოსასუნა“ საკუთარ კედლებში ყოველთვის გამოირჩევა მჭიდრო დაცვითა და მაღალი პრესინგით, რაც ტექნიკურ „რეალს“ თავისუფლად სუნთქვის საშუალებას არ აძლევს.

ალვარო არბელოა, რომელიც თავისი პრაგმატული და ტაქტიკურად მოქნილი სტილით გამოირჩევა, ესპანელი სპეციალისტი ამ მატჩში სავარაუდოდ  დიდ აქცენტს ფლანგებიდან სწრაფ გადასვლებზე გააკეთებს. მოსალოდნელია, რომ მწვრთნელი სასტარტოში კვლავ მბაპეს და ვინისიუსს დაეყრდნობა, რათა „ოსასუნას“ მაღალი დაცვის ხაზი კონტრშეტევებზე დაიჭიროს. არბელოას მთავარი ამოცანაა, გაანეიტრალოს მასპინძელთა საჰაერო უპირატესობა სტანდარტულების დროს, რაც პამპლონელთა მთავარი იარაღია. მადრიდელთა ნახევარდაცვაში კი ახალგაზრდა ვარსკვლავების ენერგია უნდა გახდეს გადამწყვეტი ფაქტორი ცენტრში დომინირებისთვის.

„რეალს“ ამ შეხვედრაში ტრავმის გამო რამდენიმე მოთამაშე დააკლდება, თუმცა მწყობრშია ანტონიო რუდიგერი, რომელიც გუნდის დაცვით რესურსს მნიშვნელოვნად ზრდის.  „ოსასუნას“ მხარეს კი განსაკუთრებული ყურადღება მათ ფორვარდ ანტე ბუდიმირზე უნდა გამახვილდეს, რომელიც წელსაც მოწოდების სიმაღლეზე დგას.

ამ მომენტისთვის ლა ლიგის სატურნირო ცხრილში „რეალი“ უახლოეს მდევარს 2 ქულით უსწრებს. დღევანდელი გამარჯვება მათ ფსიქოლოგიურ უპირატესობას მისცემს ჩემპიონთა ლიგის მატჩის  წინ. გულშემატკივრები ელოდებიან, დაამტკიცებს თუ არა არბელოა კიდევ ერთხელ, რომ ის ჩაბი ალონსოს და კარლო ანჩელოტის ღირსეული მემკვიდრეა და შეუძლია თუ არა მას ისეთი რთული ბარიერის გადალახვა, როგორიც „ელ სადარია“.