კარლო ანჩელოტიმ ვრცელი და მრავლისმომცველი ინტერვიუ ჩაწერა, სადაც ბრაზილიურ ფეხბურთზე და ეროვნულ ნაკრებში დარჩენაზე ისაუბრა.

რიო დე ჟანეიროს მზით განათებულ სანაპიროზე, კარლო ანჩელოტი ისეთივე მშვიდია, როგორც ყოველთვის. თუმცა, მის გამოხედვაში ახალი ნაპერწკალი ჩანს - „სელესაოს“ გაძღოლის პასუხისმგებლობა. იტალიელმა მაესტრომ, რომელმაც საკლუბო ფეხბურთში ყველაფერი მოიგო, გადაწყვიტა თავისი კარიერის ფინალური აკორდი მსოფლიოს ყველაზე ტიტულოვან ნაკრებთან ერთად დაუკრას. ინტერვიუში ის გულახდილად საუბრობს იმ ჯადოსნურ ატმოსფეროზე, რომელიც ბრაზილიაში დახვდა.

„აქაურობა სხვა სამყაროა,“ – იწყებს კარლო ღიმილით. „ბრაზილიაში ფეხბურთი არ არის სპორტი, ის ჰაერია, რომლითაც ხალხი სუნთქავს. ევროპაში ჩვენ ტაქტიკაზე ვგიჟდებით, აქ კი ხალხი ემოციით ცოცხლობს. პირველივე დღიდან, როცა რიოში ჩამოვედი, ვიგრძენი ის სითბო და სიყვარული, რაც ამ ყვითელ მაისურს უკავშირდება. ხალხი ქუჩაში მაჩერებს არა მხოლოდ ავტოგრაფისთვის, არამედ იმისთვის, რომ მითხრან, რამდენად სჯერათ ჩემი. ეს ნდობა ჩემთვის უდიდესი მოტივაციაა.“

ანჩელოტი აღნიშნავს, რომ ნაკრებში მისი მიღება იმაზე ბევრად მარტივი აღმოჩნდა, ვიდრე წარმოედგინა. „ფეხბურთელებმა ისე მიმიღეს, როგორც ოჯახის წევრი. ბრაზილიელებს აქვთ ეს საოცარი თვისება – იყვნენ ძალიან თავმდაბლები და ამავდროულად, წარმოუდგენლად ნიჭიერები. ჩემი ამოცანა არ არის მათ ფეხბურთის თამაში ვასწავლო, მათ ეს გენეტიკაში აქვთ. მე აქ იმისთვის ვარ, რომ ამ ნიჭს სწორი მიმართულება და ევროპული დისციპლინა შევძინო.“

„რა თქმა უნდა, ვინისიუსი, როდრიგო და მილიტაო ჩემი დასაყრდენი ძალაა. ჩვენ ერთად ბევრი ბრძოლა გადავიტანეთ მადრიდში და ეს ურთიერთგაგება ნაკრებშიც გვეხმარება. მათ იციან ჩემი მოთხოვნები, მე კი ვიცი მათი შესაძლებლობების მაქსიმუმი. ეს ბიჭები დღეს მსოფლიო ფეხბურთის ელიტაში არიან და სწორედ მათ გარშემო უნდა აშენდეს მომავლის გუნდი. დარწმუნებული ვარ, მილი მსოფლიო ჩემპიონატს სრულ მზადყოფნაში შეხვდება და ჩვენს ნაკრებს დაეხმარება.“

„ედერზე ბევრს არ საუბრობენ, მაგრამ ის ჩემთვის მსოფლიოში ერთ-ერთი საუკეთესო ცენტრალური მცველია. მისი სისწრაფე, ფიზიკური მონაცემები და რაც მთავარია, ხასიათი  არის ის, რაც ბრაზილიის დაცვას სიმტკიცეს აძლევს. მილიტაო არის ფეხბურთელი, რომელსაც შეუძლია მთელი დაცვის ხაზი მართოს და მე მისი სრული ნდობა მაქვს.“

„ენდრიკი ფენომენია,“ – ამბობს კარლო დარწმუნებით. „ის ჯერ კიდევ ბავშვია, მაგრამ მოედანზე ისე იქცევა, თითქოს 10 წლის გამოცდილება ჰქონდეს. მას აქვს ის იშვიათი ინსტინქტი, რომელიც მხოლოდ დიდ ფორვარდებს ახასიათებთ. თუ წინახაზელი „ლიონში“ ასე გააგრძელებს, 2026 წლის მსოფლიო ჩემპიონატზე ის ჩვენი ერთ-ერთი მნიშვნელოვანი ფიგურა იქნება, 2030 წლისთვის კი, მჯერა, რომ მსოფლიოს ერთ-ერთი საუკეთესო ფეხბურთელის სტატუსით წარდგება.“

„ჩვენი მიზანი მხოლოდ გამარჯვებაა. ბრაზილიისთვის სხვა შედეგი არ არსებობს. გუნდი ახლა ტრანსფორმაციის პროცესშია, მაგრამ გვაქვს ბალანსი გამოცდილებასა და ახალგაზრდულ ენერგიას შორის. 2026 წელს  ჩვენი ფეხბურთით მსოფლიოს კვლავ აღვაფრთოვანებთ. მინდა, რომ ბრაზილიელმა ხალხმა კვლავ იამაყოს თავისი ნაკრებით.“

მე მინდა ამ პროექტის ბოლომდე მიყვანა. 2030 წლის მსოფლიო ჩემპიონატი განსაკუთრებული იქნება.  ის სამ კონტინენტზე გაიმართება და სიმბოლურია, რომ ბრაზილია იქაც ფავორიტად ჩავა. ჩვენ ვქმნით სისტემას, რომელიც გრძელვადიან წარმატებაზეა ორიენტირებული. 2030 წლისთვის ეს ახალგაზრდები, როგორებიც ენდრიკი ესტევაო და სხვები არიან, თავიანთ პიკშს აჩვენებენ. არ მსურს, მოვლენებს წინ გავასწრო, მაგრამ ბრაზილიაში თავს დიდი ხნით ვხედავ.“

„ხანდახან ვუყურებ ვარჯიშზე რას აკეთებენ  ბიჭები ბურთით და გაოცებული ვრჩები. ეს ისეთი რამ არის, რასაც ვერცერთ აკადემიაში ვერ ისწავლი. ეს ნიჭი ბრაზილიურ მიწაში დევს. ჩემი როლია, ეს თავისუფლება არ შევზღუდო, პირიქით , მივცე მათ საშუალება, რომ მოედანზე ისიამოვნონ, რადგან როდესაც ბრაზილიელი ფეხბურთელი ბედნიერია, ის დაუმარცხებლის სტატუსს იძენს.“

ჟურნალისტის კითხვაზე, თუ რამდენად რთულია ენის ბარიერი, კარლომ გაიცინა. „ფეხბურთის ენა ერთია. გარდა ამისა, პორტუგალიური და იტალიური ძალიან ჰგავს ერთმანეთს. უკვე ვსწავლობ ჰიმნს – ჩემთვის მნიშვნელოვანია, რომ მოთამაშეებთან ერთად ვიმღერო სტადიონზე. ეს პატივისცემის ნიშანია იმ ქვეყნის მიმართ, რომელმაც ასე თბილად მიმიღო. მე აქ თავს ისე ვგრძნობ, როგორც საკუთარ სახლში.“

„საკლუბო ფეხბურთი დამღლელია, ყოველდღიურ რუტინას წარმოადგენს. ნაკრებში კი ყოველი შეკრება დღესასწაულია. როდესაც ვხედავ იმ იმედს, რომელიც ხალხის თვალებშია, ვხვდები, რომ სწორი არჩევანი გავაკეთე. ეს არ არის მხოლოდ სამუშაო, ეს მისიაა – დავუბრუნოთ ბრაზილიას ის ადგილი, რომელსაც იმსახურებს.“

„მინდა, რომ ბრაზილიელმა ხალხმა იცოდეს, რომ  ჩვენ ყველაფერს გავაკეთებთ. გზა 2026 და 2030 წლებისკენ რთული იქნება, იქნება დაბრკოლებებიც, მაგრამ ჩვენი ერთიანობით ყველაფერს შევძლებთ. ნიჭი გვაქვს, სურვილი გვაქვს, ახლა კი დროა ეს ყველაფერი ოქროს მედლებში გადავთარგმნოთ. მჯერა, რომ მომავალი წლები ბრაზილიის დომინირების ხანა იქნება.“