ბრაზილიური ფეხბურთის ახალი ამომავალი ვარსკვლავის, ენდრიკ ფელიპეს გარშემო ატეხილი აჟიოტაჟი „რეალში“ გადმოსვლისთანავე პიკს აღწევდა. თუმცა, ვარსკვლავური კონკურენციის პირობებში, ბრაზილიელს სათამაშო დრო არ ეძლეოდა, ამის პარალელურად, მადრიდულმა გრანდმა პრაგმატული გადაწყვეტილება მიიღო და ახალგაზრდა ფორვარდი იჯარის წესით ფრანგულ „ლიონში“ გაუშვა. ამ ნაბიჯმა ბევრს კითხვის ნიშნები გაუჩინა, თუმცა საფრანგეთში გატარებულმა ერთმა თვემაც  დაადასტურა, რომ ენდრიკი არამხოლოდ მზად არის ევროპული ფეხბურთისთვის, არამედ მისი პოტენციალი ყოველგვარ მოლოდინს აჭარბებს.

„ლიონის“ მაისურით ჩატარებული მატჩები ენდრიკისთვის ნამდვილ ბენეფისად იქცა. ფრანგულ ლიგაში მან ის თავისუფლება და სათამაშო დრო მიიღო, რაც ბერნაბეუზე მბაპესა და ვინისიუსის ჩრდილში შეუძლებელი იქნებოდა. ბრაზილიელმა კიდევ ერთხელ დაამტკიცა, რომ მასში იმალება ის „ველური“ ძალა, რომელიც თანამედროვე ფეხბურთში იშვიათობაა. ყოველი მისი შეხება ბურთთან საფრთხის მომასწავებელია მეტოქის დაცვისთვის, რაც მას თავისი ასაკის მოთამაშეებისგან მკვეთრად გამოარჩევს.

ბევრი ექსპერტი ენდრიკს ლეგენდარულ ბრაზილიელ „იმპერატორს“ - ადრიანოს ადარებს. ეს პარალელი შემთხვევითი არ არის,  ენდრიკის მარცხენა ფეხით დარტყმის სიმძლავრე და სისწრაფე პირდაპირ ასოციაციას იწვევს ადრიანოს საუკეთესო წლებთან. მისი უნარი, მოულოდნელად, ყოველგვარი მომზადების გარეშე დაარტყას შორი დისტანციიდან და ბურთი „ცხრიანში“ გაახვიოს, სწორედ იმ ფენომენალურ ნიჭზე მიუთითებს, რომლითაც ადრიანო მსოფლიოს აშინებდა.

თუმცა, ადრიანოსგან განსხვავებით, ენდრიკი უფრო მობილური და ტექნიკურად მრავალფეროვანია. მიუხედავად იმისა, რომ მას აკლია სიმაღლე, რაც მეორე სართულზე ბრძოლაში გარკვეულ დისკომფორტს უქმნის, ის ამ ნაკლს სხვა კომპონენტებით აკომპენსირებს. მისი ფიზიკური მონაცემები სხვა მიმართულებით არის განვითარებული. დაბალი სიმძიმის ცენტრი, მძლავრი კუნთები და წარმოუდგენელი მოქნილობა მას საშუალებას აძლევს, უმცირეს სივრცეშიც კი შეინარჩუნოს ბურთი და მცველები ერთი მეორეს მიყოლებით დატოვოს უსაქმოდ.

ენდრიკის ბურთის ფლობის ტექნიკა და დრიბლინგის მანერა ტიპური ბრაზილიური „ჟოგა ბონიტოს“ ნაზავია თანამედროვე, ათლეტურ ფეხბურთთან. ის არ არის მხოლოდ „ცხრა ნომერი“, რომელიც საჯარიმოში პასს ელოდება. მას შეუძლია სიღრმიდან წამოიღოს ბურთი, ააჩქაროს თამაში და თავადვე დააგვირგვინოს შეტევა. ეს მრავალმხრივობა მას სახიფათო იარაღად აქცევს ნებისმიერი ტაქტიკური სქემისთვის, განსაკუთრებით კი კონტრშეტევებზე ორიენტირებულ გუნდებში.

მთავარი კითხვა, რომელიც მადრიდში ისმის, არის მისი თავსებადობა კილიან მბაპესთან. თუკი მომავალ ზაფხულს ენდრიკი „მერენგებში“ დაბრუნდება, არბელოას, ან „ბლანკოსის“ მომავალ მწვრთნელს მოუწევს რთული თავსატეხის ამოხსნა. თუმცა, ანალიტიკოსები მიიჩნევენ, რომ ენდრიკისა და კილიანის დუეტი შეიძლება ისტორიულიც გახდეს. ფრანგის სისწრაფე და ბრაზილიელის ინსტინქტები ერთმანეთს შესანიშნავად შეავსებს. ენდრიკს შეუძლია ითამაშოს როგორც ცენტრფორვარდად, ისე მბაპეს სიღრმიდან მხარდამჭერად, რაც მეტოქის დაცვას მუდმივ ქაოსში ამყოფებს.

მომდევნო ზაფხული ენდრიკის კარიერაში გარდამტეხი იქნება. „ლიონში“ მიღებული გამოცდილება მას საშუალებას მისცემს, მადრიდში დაბრუნდეს არა როგორც იმედისმომცემი ბავშვი, არამედ როგორც ჩამოყალიბებული ლიდერი. მისი დაბრუნება აბსოლუტურად ლოგიკური ნაბიჯი იქნება, რადგან „ბლანკოსს“ სჭირდება კლასიკური დამგვირგვინებელი, რომელიც მომენტების რეალიზაციას ურთულეს ვითარებაშიც შეძლებს. ენდრიკი სწორედ ასეთი მოთამაშეა.

ენდრიკის ურთიერთობა კარლო ანჩელოტისთან ცალკე განხილვის თემაა. იტალიელი სპეციალისტი ცნობილია ახალგაზრდა ტალანტების ფრთხილი, მაგრამ ეფექტური ინტეგრირებით. ანჩელოტის სჯერა ენდრიკის და სწორედ მისი რჩევით გადაწყდა იჯარა საფრანგეთში, რათა ახალგაზრდა ბიჭს „კუნთები გაემაგრებინა“. პაპა კარლოს სიმშვიდე და ენდრიკის ემოციური ბუნება კარგ ბალანსს ქმნის, მწვრთნელი იქნება ის ფილტრი, რომელიც ბრაზილიელის დაუოკებელ ენერგიას სწორ კალაპოტში მოაქცევს და ეროვნული ნაკრების ლიდერად აქცევს.

ბრაზილიის ეროვნულ ნაკრებში ენდრიკის ადგილი უკვე გარანტირებული ჩანს. „სელესაო“ დიდი ხანია ეძებს ნამდვილ ბომბარდირს, რომელიც რონალდო ნაზარიოს და სხვების მემკვიდრეობას ღირსეულად გააგრძელებს. ფელიპეს ფენომენი ბრაზილიელი გულშემატკივრებისთვის იმედის სიმბოლოა. ნაკრების მწვრთნელებისთვის მისი „ლიონში“ თამაში კარგი ინდიკატორია იმისა, რომ მოთამაშე მზად არის ევროპული ფიზიკური წნეხისთვის, რაც მსოფლიო ჩემპიონატზე გადამწყვეტი იქნება.

გარდა სათამაშო უნარებისა, ენდრიკი მარკეტინგულადაც ძალიან მიმზიდველია. მისი სტილი, ემოციური აღნიშვნები და ქარიზმა მას გულშემატკივრების საყვარელ მოთამაშედ აქცევს. ბერნაბეუ ყოველთვის ეძებს ახალ კერპს და ენდრიკს აქვს ყველა მონაცემი იმისთვის, რომ მადრიდული პუბლიკის ახალი რჩეული გახდეს. 

ფეხბურთის ისტორიას ბევრი „ახალი პელე“ და „ახალი რონალდო“ ახსოვს, რომლებიც გზაზე დაიკარგნენ. თუმცა ენდრიკი სხვა გზას გადის. ის არ ჩქარობს, ის სწავლობს. „ლიონის“ ეტაპი მისთვის უმაღლესი სკოლაა, სადაც ის სწავლობს, როგორ იყოს გუნდის მთავარი ძალა. ეს გამოცდილება მას დაეხმარება, რომ მადრიდში დაბრუნებისას აღარ იყოს უბრალოდ „ნიჭიერი ბიჭი ბრაზილიიდან“.

ენდრიკი არის მომავლის ისტორია, რომელიც უკვე დღეს იწერება. მისი ყოველი გოლი საფრანგეთში არის გზავნილი მადრიდისთვის - „მე მზად ვარ!“. „იმპერატორის“ დარტყმა და ბრაზილიური სული – ეს ის ნაზავია, რომელიც „ბლანკოსს“ კიდევ მრავალი წლის განმავლობაში შეუნარჩუნებს ევროპული ფეხბურთის ტახტს.