ვაგრძელებთ, ანალიტიკური მიმოხილვების შემოთავაზებას, რომელიც მადრიდის „რეალის“ პოტენციურ სამიზნეებს ეხება. დღეს ვისაუბროთ ადამ ვორტონზე.

ადამ ვორტონის სახელი ევროპული ფეხბურთის რადარებზე ელვისებურად გამოჩნდა. "კრისტალ პალასის" ნახევარმცველმა სულ რაღაც ერთ წელიწადში მოახერხა ჩემპიონშიფიდან პრემიერ ლიგის ერთ-ერთ ყველაზე მოთხოვნად ტალანტად ქცევა. მადრიდის "რეალის" მხრიდან მისი ინტერესი კი შემთხვევითი არ არის. სამეფო კლუბი ტონი კროოსის წასვლის შემდეგ ეძებს მოთამაშეს, რომელიც თამაშის ტემპს გააკონტროლებს და მოედანს ,,ზემოდან" დაინახავს.

ვორტონი კლასიკური "Deep-lying playmaker"-ია, თუმცა თანამედროვე ელემენტებით. მისი მთავარი მანევრი სივრცის პოვნა და ბურთის მიღებამდე გადაწყვეტილების მიღებაა. ის არ არის ფეხბურთელი, რომელიც ბურთით დიდ მანძილს ფარავს; მისი იარაღი პოზიციონირებაა. ვორტონი მუდამ ეძებს თავისუფალ ზონებს მცველებს შორის, რათა მიიღოს ბურთი და ერთი შეხებით გადაანაწილოს ის შეტევის ფლანგებზე. მისი სხეულის მოძრაობა ბურთის მიღებისას მეტოქეს ხშირად აბნევს, რაც მას საშუალებას აძლევს, წნეხის ქვეშაც კი შეინარჩუნოს სიმშვიდე.

ციფრები მის განსაკუთრებულობაზე მეტყველებს. ვორტონი გამოირჩევა პროგრესული გადაცემების მაღალი სიზუსტით  საშუალოდ 5-6 მატჩში მისი პასების სიზუსტე საშუალო და გრძელ დისტანციებზე 85-89%-ს აღწევს, რაც პრემიერლიგის ინტენსივობის გათვალისწინებით ფანტასტიკური შედეგია. გარდა ამისა, ის საოცრად პროდუქტიულია დაცვაშიც, მატჩში საშუალოდ 3-ზე მეტი ართმევა და ჩაჭრა აქვს, რაც ამტკიცებს, რომ  მხოლოდ შემოქმედი კი არა, მშრომელი ნახევარმცველიცაა.

სტილისტურად ვორტონი ყველაზე მეტად სერხიო ბუსკეტსისა და ტონი კროოსის ნაზავს მოგვაგონებს. ბუსკეტსისგან მას აქვს ბურთის ფლობისას სიმშვიდე და უხილავი მუშაობა დაცვაში, ხოლო კროოსისგან  დიაგონალური გადაცემების სიზუსტე და თამაშის ხედვა. მას ასევე ხშირად ადარებენ ახალგაზრდა მაიკლ კერიკს, მისი ელეგანტური და არაფორსირებული სათამაშო სტილის გამო.

მადრიდის „ბლანკოსს" დღეს ყველაზე მეტად აკლია ფეხბურთელი, რომელიც ნახევარდაცვასა და თავდასხმას შორის დამაკავშირებელი ხიდი იქნება. ვალვერდე, ჩუამენი და კამავინგა ფიზიკურად ძლიერი და დინამიური მოთამაშეები არიან, მაგრამ მათ აკლიათ კროოსისეული მათემატიკური სიზუსტე. ვორტონს შეუძლია თამაშის რიტმის დაწევა ან აჩქარება საჭიროებისამებრ, რაც „რეალის" ნახევარდაცვას უფრო დაბალანსებულს და მრავალფეროვანს გახდის.

ვორტონი არ არის “ათიანი", რომელიც საჯარიმოსთან დრიბლინგით შევა, თუმცა ის გლობალურად შემოქმედებითია. მისი კრეატივი ვლინდება იმაში, თუ როგორ ხსნის მეტოქის დაცვის პირველ და მეორე ხაზებს ერთი პასით. ის ხედავს პარტნიორის მოძრაობას მანამ, სანამ ეს მოძრაობა დაიწყება. ეს არის ინტელექტუალური შემოქმედება, რომელიც უფრო ფასეულია თანამედროვე ფეხბურთში, ვიდრე უბრალოდ ეფექტური ფინტები.

ადამი არ მიეკუთვნება "შუშის" ფეხბურთელების კატეგორიას. მისი ტრავმების ისტორია საკმაოდ სუფთაა. მიუხედავად იმისა, რომ პრემიერლიგაში მაღალი ინტენსივობით უწევს თამაში, კარგად უმკლავდება დატვირთვებს. მისი სათამაშო სტილიც,  ნაკლები კონტაქტი და მეტი პოზიციური უპირატესობა  ეხმარება  მძიმე ტრავმების თავიდან არიდებაში. თუმცა, „რეალის" დონის კლუბში გადასვლა მოითხოვს ფიზიკური კონდიციების კიდევ უფრო გაუმჯობესებას.

ტოპ კლუბები ვორტონში ხედავენ დეფიციტურ პროფილს. დღეს ბევრია მორბენალი და მებრძოლი ნახევარმცველი, მაგრამ ძალიან ცოტაა ისეთი, ვისაც ბურთით „თამაში" შეუძლია. მისი ახალგაზრდა ასაკი და უკვე ჩამოყალიბებული სათამაშო ინტელექტი  იდეალურ გრძელვადიან ინვესტიციად აქცევს. ის არის ფეხბურთელი, რომლის გარშემოც შესაძლებელია გუნდის შენება მომდევნო 10-12 წლის განმავლობაში.