ჩაბი ალონსომ „ბარსელონასთან“ მატჩის წინ პრესკონფერენცია გამართა.

„ეს სუპერთასის ფინალია, სადაც „ელ კლასიკო“ შედგება. რა თქმა უნდა, ამაღელვებელ მომენტში ვართ და გვჯერა, რომ წარმატების მიღწევას შევძლებთ, ჩვენ ბოლომდე ბრძოლას ვაპირებთ.“

„კილიან მბაპე გუნდს შემოუერთდა, „ატლეტიკოსთან“ მისი თამაში მიზანშეწონილი არ იყო, მაგრამ მას შემდეგ, რაც ფინალში გავედით და მისი კონდიციებიც გაუმჯობესდა, მდგომარეობა სრულფასოვნად უნდა შევაფასოთ. დღევანდელ ვარჯიშზე დავაკვირდებით, ღირს თუ არა კილიანის სასტარტო შემადგენლობაში დაყენება, თუმცა ის გარკვეულ დროს აუცილებლად მიიღებს.“

„დიახ, „ბარსელონამ“ 1 დღით მეტი დაისვენა, მაგრამ ეს ვერ იქნება გადამწყვეტი. წილისყრის შედეგებს ვერსად გავექცევით.“

„სურვილი და მოტივაცია ყველაფერს გადააჭარბებს და ყველაფერს შეგვაძლებინებს. დაცვის ცენტრში სერიოზული პრობლემები გვაქვს. ვიმედოვნებ, დღევანდელ ვარჯიშზე ცენტრალურ მცველებს დავტვირთავ.“

„მბაპე ისე არ ითამაშებს, თუ ყველა რისკი შეფასებული არ იქნება. ტრავმის გართულება თავიდან უნდა ავირიდოთ. როგორც უკვე გითხარით, ყველაფერი სამედიცინო შტაბთან კონსულტაციის შემდეგ განისაზღვრება. ყველაფერს ავწონ-დავწონით.“

„წარმატების ფორმულა მხოლოდ სისწრაფეში, მუდმივ პრესინგსა და მომენტების სრულფასოვან გამოყენებაში მდგომარეობს. თუ ჩვენ ამ ყველაფერს შევასრულებთ, „ელ კლასიკოს“ მოვიგებთ და სუპერთასს დავეუფლებით.“
„ვინისიუსი ემოციური ადამიანია, მაგრამ ის ახლა შესანიშნავ პერიოდში იმყოფება და არანაირი ფსიქოლოგიური ზეწოლა არ აქვს. ბრაზილიელის მიმართ, როგორც სამწვრთნელო შტაბს, ასევე თანაგუნდელებს დიდი მხარდაჭერა აქვთ.“

„გუნდი მოედანზე თავდაჯერებული გავა, ჩვენ დავამარცხეთ „ბარსელონა“ და ვიცით, რომ ამის გაკეთება კიდევ იქნება შესაძლებელი.“

„„რეალი“ კარგად იცნობს „ბარსელონას“ და პირიქით, ფლიკის გუნდი კარგად იცნობს მადრიდულ კოლექტივს. სიურპრიზებს არ ველი, დარწმუნებული ვარ, გულშემატკივართა დიდი არმია უშეღავათო ბრძოლას იხილავს.“

„ყველა პროექტს სჭირდება დრო განვითარებისთვის. ჩვენ მხოლოდ 4 თვეა ინტენსიური მატჩები გვაქვს და ბევრი შტრიხი გამოიკვეთა. ეჭვი არ მეპარება, გუნდი შეძლებს საუკეთესო შედეგების ჩვენებას.“

„ლამინ იამალი ფანტასტიკური მოთამაშეა, არნახული სისწრაფე და ტექნიკა აქვს, თუმცა მისთვის სპეციალური პროგრამა ვერ გვექნება, ჩვენ მომზადების სტილს არ ვცვლით.“

„პედრის სახით კატალონიურ გრანდს ძალიან ჭკვიანი ნახევარმცველი ჰყავს, მისი დიდი შესაძლებლობების გათვალისწინებით, ნახევარდაცვა ძალიან მობილური ხდება.“

„ვალვერდეს მოტივაცია უსაზღვროა, მადრიდულ დერბიში გატანილმა გოლმა ის ძალიან გააბედნიერა.“