ჩაბი ალონსომ „რაიო ვალეკანოსთან“ ვერმოგების შემდეგ პრესკონფერენცია გამართა.

„ეს იყო მატჩი, რომელიც მოითხოვდა უფრო მეტ კრეატივს. გვქონდა არაერთი მომენტი, მაგრამ მოსაგებად მეტი იყო საჭირო. ძალიან დასანანია ქულების დაკარგვა, მაგრამ ვერაფერს შევცვლით, წინ უნდა ვიყუროთ და სანაკრებო პაუზის შემდეგ მოგებები გავაგრძელოთ.“

„ჩვენ არ გვქონია ემოციური აღმავლობა და დაცემა. მე ვფიქრობ, რომ „ბარსელონასთან„ გამარჯვებას ფსიქოლოგიური მუხტი მოგვცა. არანაირი მოდუნება, გუნდი კონცენტრირებულია.“

„ჯერ ნოემბერია, ეს კი იმას ნიშნავს, რომ დიდი გზა გვაქვს გასავლელი. ზუსტად ვიცი, რომ გუნდის ფორმის პიკზე გავა და საოცარი ხარისხის ფეხბურთს ითამაშებს.“

„ყველა დუელს ვერ ვიგებთ, მაგრამ ყოველთვის გვაქვს უპირატესობა.  მე ვფიქრობ, რომ ინტენსიური თამაში, ენერგიის ხარჯვა და პრესინგი, ყოველთვის მოიტანს წარმატებას.“

„კრიზისზე საუბარი ზედმეტია. ჩვენ ახლა გვაქვს დრო იმისთვის, რომ დაშვებული შეცდომები გავაანალიზოთ და ყველაფერი გავარჩიოთ. სანაკრებო პაუზის შემდეგ იწყება ინტენსიური კალენდარი, ფეხბურთელები ნაკრებებში აღარ წავლენ, დეკემბერი კი საკმაოდ მომთხოვნი იქნება.“

„ნუ დაგვავიწყდება, რომ მალე ასპარეზზე „ლა კოპა“ შემოვა, შემდეგ კი ესპანეთის სუპერთასი.“

„ვალვერდეს დაზიანების შესახებ ზუსტი ინფორმაცია არ მაქვს. მას ტრავმა არ გართულებია, ახლა სხვა სახის დაზიანება დაფიქსირდა. სამედიცინო შემოწმება ბევრ რამეს გახდის ნათელს.“

„მბაპეს ვუთხარი, რომ „რაიო ვალეკანოსთან“ სიღრმიდან ეთამაშა, ვინაიდან მეტოქე საკმაოდ ზემოთ იყო ამოწეული და ბევრს მოძრაობდა.“

„დაპირისპირება ვინისიუსთან? ვფიქრობ, ამაზე საუბარი სასაცილოა. არანაირი დაპირისპირება არ არსებობს, ბრაზილიელი ძალიან კარგად ვარჯიშობს, ძველი ინციდენტი კი ისტორიას დარჩა.“