როგორც ჩანს, არნე სლოტს დაცვის ლიდერის გაშვება არ სურს. „ლივერპული“ მზად არის, იბუ კონატეს კიდევ უფრო მიმზიდველი კონტრაქტი შესთავაზოს.

ბრიტანული გამოცემების ცნობით, კონატეს მერსისაიდული კლუბი 6 წლიან კონტრაქტს სთავაზობს, სადაც ფეხბურთელის ხელფასიც მნიშვნელოვნად იზრდება.

ინგლისში ფიქრობენ, რომ კონატეს „რეალში“ გადასვლა „ლივერპულს“ სერიოზულად დააზიანებს, სწორედ ამიტომ, „წითლები“ მზად არის, უკანახაზელს წელიწადში 13.5 მილიონი ევრო შესთავაზონ, რაც რა თქმა უნდა, მიმზიდველი წინადადებაა.

მადრიდის „რეალის“ მაქსიმუმი კონატეს ხელფასთან დაკავშირებით 7 მილიონი იქნება, ეს კი იმას ნიშნავს, რომ ფრანგს „ენფილდზე“ წელიწადში 2-ჯერ მეტის გამომუშავების პერსპექტივა ექნება.

ამ ეტაპისთვის მოლაპარაკებების ახალი რაუნდი დაწყებული არ არის, თუმცა „ლივერპული“ მოვლენების წარმართვას ფორსირებულ რეჟიმში გეგმავს.