არაერთი ავტორიტეტული გამოცემის ცნობით, 2026 წლიდან სანაკრებო შეკრებების ვადები იცვლება, რაც საკლუბო ფეხბურთის კალენდარშიც განაპირობებს ცვლილებებს.

კერძოდ, ინიციატივის მიხედვით, სექტემბრის და ოქტომბრის შეკრებები გაერთიანდება.

„ფიფაში“ ფიქრობენ, რომ 2026 წლის 23 სექტემბრიდან 8 ოქტომბრამდე პერიოდი სავსებით საკმარისი იქნება იმისთვის, რომ საკლუბო ფეხბურთმა პაუზა აიღოს და ეროვნულმა ნაკრებებმა 4 თამაში ჩაატარონ.

ახალი ფორმატის მიხედვით, ნაკრებები სექტემბერში, ოქტომბერსა და ნოემბერში აღარ შეიკრიბებიან და 2-2 დაპირისპირებას არ გამართავენ. შესაბამისად, 2 მატჩის ნაცვლად ნაკრებები 4 შეხვედრას ჩაატარებენ, რაც საკლუბო ფეხბურთსაც მისცემს ამოსუნთქვის საშუალებას.

ფეხბურთელებს ყოველთვე აღარ მოუწევთ ათასობით კილომეტრის ფრენა და შემდეგ კლუბებში დაბრუნება.

აღნიშნული ინიციატივა ძალაში 2026 წლიდან შევა და მინიმუმ 2030 წლამდე იმოქმედებს.

რაც შეეხება მიზეზებს, სხვა ყველა მიზეზთან ერთად სახელდება მსოფლიოს 2026 წლის ჩემპიონატის ვადები და ფინალი, რომელიც 19 ივლისს უნდა გაიმართოს, ეს კი იმას ნიშნავს, რომ ფინალში და ასევე 1/2 ფინალში მონაწილე ფეხბურთელებისთვის დასვენების პერიოდი მნიშვნელოვნად იქნება შემცირებული, სანაკრებო ფორმატის ცვლილება კი კალენდარს შეძლებისდაგვარად გაამარტივებს.

აღნიშნულ გადაწყვეტილებაზე ოფიციალური განცხადება ჯერ არ გაკეთებულა.