ფედე ვალვერდემ „რეალის“ ოფიციალურ ვებ-გვერდთან ინტერვიუ ჩაწერა.

„ენთუზიაზმი არ შეცვლილა. იგივე მოტივაციით და შემართებით ვარ და მჯერა, რომ ახალი სეზონი წარმატებული იქნება. ჩვენ სულ ცოტა დრო გვაქვს სათანადოდ მოსამზადებლად, შესაბამისად, მაქსიმალური ყურადღება და ენერგიის გაღება გვმართებს.“

„ფიზიკურ კონდიციებს დიდ ყურადღებას ვუთმობთ და გვსურს, რომ ახალ სეზონში ტრავმებმა არ შეგვაწუხოს. გასული სეზონის წარუმატებლობა მეტწილად დაზიანებებიდან გამომდინარეობდა, ვინაიდან შემადგენლობის ჩამოყალიბებას ვერ ვახერხებდით.“

„წინასასეზონო მზადება უმნიშვნელოვანესია. გუნდმა ყველაფერი უნდა გაიღოს იმისთვის, რომ ფიზიკურად გაძლიერდეს. ეს არის ერთგვარი საწვავი და ენერგია, რომელიც უნდა მოვიმარაგოთ ახალი სეზონისთვის.“

„ვმუშაობთ დაცვითი კომპონენტის გაუმჯობესებაზე, ბურთის ფლობის კომპონენტზე, ბურთთან ურთიერთობაზე, მოკლე და ზუსტ პასებზე, ტაქტიკურ მონახაზებსა და არაერთ საინტერესო საკითხზე. ვარჯიშები მრავალფეროვანი და შედეგზე გათვლილია.“

„ვამაყობ, რომ „რეალის“ კაპიტნების სიაში ვარ, ეს ჩემთვის დიდი პასუხისმგებლობაა.“