ფედერიკო ვალვერდემ „რეალის“ ოფიციალურ ვებ-გვერდთან მორიგი ინტერვიუ ჩაწერა, სადაც საინტერესო საკითხები მიმოიხილა.

„ჩვენ გვსურს, რომ „ზალცბურგთან“ შეხვედრაში ყველაზე მეტად ვაჩვენოთ ის, რასაც მთავარი მწვრთნელი ითხოვს. ერთიანობით და დიდი შემართებით ყველაფრის გაკეთებაა შესაძლებელი. დარწმუნებული ვარ, მომთხოვნი მატჩი იქნება, მაგრამ ჩვენ გამარჯვება შეგვიძლია. აუცილებელია ახალწვეულებთან სწრაფი ადაპტირება და მათი სათამაშო სპეციფიკის გათავისება.“

„ტემპერატურა მართლაც მაღალია, მაგრამ „ზალბურგთან“ შეხვედრა ღამე გაიმართება, რაც ტემპერატურულ სხვაობას მოგცემს. თუ ჩვენთვის ცხელა, ასეა მეტოქისთვისაც, სწორედ ამიტომ, პირობებს უნდა მოვერგოთ და მაქსიმუმი გავიღოთ მაღალი დონის საჩვენებლად.“

„როდესაც შარლოტაში ჩამოვედით, საოცარი მხარდაჭერა ვიგრძენით. აქ „რეალი“ ძალიან უყვართ და ჩვენ ვალდებულები ვართ, ადგილობრივი გულშემატკივრები გავახაროთ.“

„„პაჩუკას“ წინააღმდეგ არაერთი გააზრებული კომბინაცია გავათამაშეთ, ეს ძალიან მნიშვნელოვანი კომპონენტი იყო. გუნდი ცდილობს არაერთი ასპექტის დახვეწას.  ჩვენი მიზანი მსოფლიო საკლუბო ჩემპიონატის მოგებაა, ეს შედარებით შეცვლის სიტუაციას, რომელიც უტიტულო სეზონს უკავშირდება.“

„შრომა, მონდომება და წყურვილი არასდროს მაკლდა, მაგრამ რა თქმა უნდა, სასიამოვნო იყო ჩაბი ალონსოს სიტყვები, მან უმნიშვნელოვანესი ფეხბურთელი მიწოდა და ეს რა თქმა უნდა, სიამაყის მომგვრელია. მსურს, კიდევ უფრო მეტი პროგრესი ვაჩვენო და გუნდისთვის ყველა პოზიციაზე მნიშვნელოვანი როლი ვითამაშო.“

„ჩაბიმ ყველას დიდი თავდაჯერებულობა მისცა და ეს რა თქმა უნდა, უმნიშვნელოვანესი კომპონენტია. ესპანელი, როგორც ფეხბურთელი ესთეტიური და სანახაობრივი იყო, ზუსტად იგივეს თქმა შემიძლია მწვრთნელზეც. მას უყვარს კომბინაციები, ლამაზი გადაცემები და სისწრაფე.“