ესპანური გამოცემების ცნობით, მადრიდის „რეალის“ ახალი მთავარი მწვრთნელი, ჩაბი ალონსო თავდასხმის გაძლიერებას ითხოვს.

Confidencial-ის ცნობით, ჩაბიმ ფლორენტინო პერესს აუხსნა, რომ გუნდში სჭირდება მოთამაშე, რომელიც ტიპიური ფორვარდია. მოთამაშე, რომელსაც შეუძლია თამაშის სურათის შეცვლა, თავით გოლის გატანა და მაღალ ბურთებზე ბრძოლა.

ალონსოს აზრით, „რეალი“ ამ მხრივ სერიოზულად მოიკოჭლებს, ვინაიდან წინა ხაზში მაღალი და თავით კარგად მოთამაშე ფეხბურთელები არ ჰყავს.

შარშან კოლექტივში ხოსელუ ირიცხებოდა, უფრო ადრე ბენზემა, რომელიც ასევე ბრწყინვალედ თამაშობდა თავით. უფრო ადრე BBC-ს ფორმაციაში „რეალი“ ერთ-ერთი საუკეთესო იყო მეორე სართულზე ბრძოლის დროს, რადგან თავით როგორც კარიმი, ასევე რონალდუ და ბეილიც უბადლოები იყვნენ.

ისევ Confidencial-ზე დაყრნობით, ფლორენტინო პერესმა ჩაბის ვიქტორ გიოკერეშის კანდიდატურის განხილვა თხოვა და მაშინვე თანხმობა მიიღო. მეტიც, ალონსო მიიჩნევს, რომ ვიქტორი „9“-იანის პოზიციაზე იდეალური შენაძენი იქნება.

მიუხედავად იმისა, რომ „ბლანკოსს“ წინა ხაზში ვინისიუსი, მბაპე და როდრიგო ჰყავს, ალონსო ტიპიური ფორვარდის საჭიროებას ხედავს.

ასევე აღსანიშნავია, რომ გიოკერეშს ამ სეზონში „სპორტინგის“ შემადგენლობაში არანორმალური ციფრები აქვს. კერძოდ, პორტუგალიის ჩემპიონატში მოთამაშემ 31 თამაში ჩაატარა და 38 გოლი გაიტანა, ამას კი 7 საგოლე გადაცემაც მიაყოლა. ჩემპიონთა ლიგაზე ვიქტორის ანგარიშზე 8 თამაში და 6 გოლია, პორტუგალიის თასზე კი 6 თამაშში 4 გოლი და 3 საგოლე გადაცემა.

გიოკერეშის შესაძლებლობები ამ ეტაპზე 70 მილიონ ევროდ არის შეფასებული.