კარლო ანჩელოტიმ „ალავესთან“ დაპირისპირების წინ პრესკონფერენცია გამართა.

„ყველა ფიქრობს, რომ ჩვენ სრული კონცენტრაცია „არსენალზე“ გვაქვს გადატანილი, მაგრამ ხვალ ლა ლიგის უმნიშვნელოვანესი შეხვედრა გველის, სწორედ ამიტომ, „ალავესზე“ ვფიქრობთ და ამ შეხვედრაზე გადაგვაქვს ყურადღება.“

„შეიძლება ითქვას, რომ „ალავესის“ დამარცხებას ფუნდამენტური როლიც ექნება, რადგან ამით დავიბრუნებთ თვითრწმენას და ასევე გავიუმჯობესებთ მდგომარეობას ტურნირზე, ვინაიდან ახლა ქულების დაკარგვა ფაქტობრივად ტურნირის დათმობას ნიშნავს.“

„როდესაც მძიმე მატჩი გვაქვს, რა თქმა უნდა მძიმე განწყობა იქმნება, მაგრამ ჩვენ გვაქვს შეცდომების გაანალიზების კარგი უნარი.“

„კლუბი ყოველთვის მხარს მიჭერს. ახლა მომავალზე საუბარი ნამდვილად არ შემიძლია. კონტრაქტის მიხედვით გუნდში 2026 წლის 30 ივნისამდე უნდა დავრჩე. მოდით დაველოდოთ ზაფხულს და შევაჯამოთ ნაჩვენები შედეგები. მას შემდეგ, რაც ხელმძღვანელობა მეტყვის, რომ საჭირო არ ვარ, მე სხვა მიმართულებით ვივლი, ჩვენს შორის დიდი პატივისცემაა.“

„ცოტა სირბილი? დიახ, „არსენალმა“ ჩვენზე 13 კილომეტრით მეტი ირბინა და ეს დასაფიქრებელი კომპონენტია. სწორედ ცუდმა გამოსვლამ მოიტანა შედეგი, რომელიც ლონდონში დაფიქსირდა.“

„„რეალი“ იბრძოლებს ბოლო წუთამდე, ჩვენი ხელწერა დანებება არ არის. მერწმუნეთ, „არსენალთან“ სულ სხვა ფეხბურთს ვითამაშებთ და 1/2 ფინალში გასვლას შევეცდებით.“

„დანი სებალიოსი განაცხადში მოხვდება, ის ხელმისაწვდომი იქნება, როგორც „ალავესის“ წინააღმდეგ, ასევე ჩემპიონთა ლიგაზე. სიმართლე გითხრათ, ეს ჩემთვის სასიამოვნო სიურპრიზია, რადგან ესპანელი ნახევარმცველი გუნდისთვის დიდ ძალას წარმოადგენს.“

„ვინის და როდრიგო მშრალი სერიები? ორივე მოთამაშე გაიტანს, მათ რთული მომენტები ჰქონდათ, მაგრამ ეს ბუნებრივია.“

„არ ვიცი, რატომ ვთამაშობთ კვირას და არა შაბათს, თუმცა ახლა ამაზე საუბარი არ ღირს, რადგან დასვენებისთვის 72 საათზე მეტი გვექნება.“

„ბოლო კვირებში „რეალს“ უჭირდა, როგორც ინდივიდუალურ, ასევე კოლექტიურ დონეზე. ხშირად გვიჭირდა ენერგიის არქონის გამო, ხშირად გვქონდა ტექნიკური წუნი. მერწმუნეთ, ყველა დეტალი გაანალიზებულია და სეზონის ყველაზე მნიშვნელოვან ეტაპს სრული ყურადღებით და პასუხისმგებლობით ვხვდებით.“

„რატომ უნდა გვენდონ ქომაგები? იმიტომ, რომ ჩვენ არერთხელ გამოვსულვართ რთული სიტუაციიდან, ამისთვის არგუმენტებიც კი  არ არის საჭირო.“

„ჩვენ გვაქვს იმის კომპეტენცია და გამოცდილება, რომ ყველა ტურნირზე ბოლომდე ვიბრძოლოთ, დანარჩენს მომდევნო მატჩები გვიჩვენებს.“