ბრაზილიის ნაკრებში სრული ქაოსია, რაც ამ სანაკრებო შეკრებაზეც გამოჩნდა. სამხრეთ-ამერიკელები ევროპელ მწვრთნელს ეძებენ, რომელსაც კარგი გამოცდილება აქვს და ქაოსური სიტუაციის დალაგება შეუძლია.

კარლო ანჩელოტის მიმართ ინტერესის შესახებ ბრაზილიაში ჯერ კიდევ 1 წლის წინ იწერებოდა, მაგრამ იტალიელმა სპეციალისტმა „რეალთან“ ერთად საოცარი სეზონი შემოგვთავაზა, სადაც ჩემპიონთა ლიგა და ლა ლიგა მოიგო, შესაბამისად, ფლორენტინო პერესმა ის არსად გაუშვა.

ახლა კარლოს წასვლაზე კვლავ იწერება, ასევე იწერება არაერთ კლუბზე, რომელიც მას სამსახურს სთავაზობს, თუმცა თუ ანჩელოტი „მერენგების“ მთავარი მწვრთნელის პოსტს დატოვებს, ბრაზილიის ნაკრები ყველაფერს იღონებს მის დასაყოლიებლად.

საქმეში ერთვება რონალდო ნაზარიო, რობერტო კარლოსი და ბრაზილიური ფეხბურთის სხვა ლეგენდები. ბრაზილიაში მიიჩნევენ, რომ იტალიელ სპეციალისტთან თანამშრომლობა ყველაზე კარგი გამოსავალი იქნება.

ამასთანავე ცნობილია, რომ თუ 2025 წლის ზაფხულში ანჩელოტი ბრაზილიელებთან თანამშრომლობას დათანხმდება, ის მიიღებს გრძელვადიან კონტრაქტს, რომელიც 5 წელიწადზე იქნება გათვლილი, რაც იმას ნიშნავს, რომ გამოცდილი დამრიგებელი ეროვნულ გუნდს მსოფლიო მუნდიალზე გაიყვანს როგორც 2026 , ასევე 2030 წელს.

ბრაზილიელებს ეჭვი არ ეპარებათ, რომ „რეალის“ მწვრთნელი მათთვის იდეალური ვარიანტი იქნება. ასევე გასათვალისწინებელია როდრიგოს და ვინისიუსის ფაქტორი, რომლებსაც კარლიტოსთან ბრწყინვალე ურთიერთობა აქვთ.