გერმანული გამოცემები იუწყებიან, რომ ჩაბი ალონსო ბუნდესლიგაში დარჩენას აპირებს.

ბასკი სპეციალისტის გეგმით, ის „ლევერკუზენის“ სათავეში მომდევნო სეზონშიც უნდა დარჩეს, რაც მადრიდის „რეალის“ გეგმებს ურევს.

თითქოს ეს საკითხი პრობლემატური არ უნდა იყოს, რადგან ფლორენტინო პერესს კარლო ანჩელოტისთან 2026 წლის 30 ივნისამდე აკავშირებს ხელშეკრულება, მაგრამ მადრიდში მიიჩნევენ, რომ ანჩელოტიმ კარი უნდა გაიხუროს და გუნდში ახალი ეტაპი დაიწყოს.

თუ ალონსო ბუნდესლიგაში მართლაც დარჩება, სამეფო კლუბს გეგმების შეცვლა მოუწევს. 1 წლით პერესი არავის დანიშნავს და ჩაბის არ დაელოდება, სწორედ ამიტომ, „ბლანკოსს“ რამდენიმე ვარიანტი აქვს.

პირველი ვარიანტის მიხედვით ანჩელოტი დარჩება, რაც საკმაოდ რთულად სავარაუდოა.

მეორე ვარიანტად განიხილება ზინედინ ზიდანის დაბრუნება 3 წლიანი ხელშეკრულებით, თუმცა ეს ფრანგ ლეგენდას ეროვნული ნაკრებისკენ მიმავალ გზას მოუჭრის.

მესამე ვარიანტი მიკელ არტეტაა, თუმცა ის „არსენალში“ საკმაოდ სტაბილურად გრძნობს თავს.

და ბოლოს, მადრიდულ კულუარებში უკვე გახშირდა ჟოზე მოურინიოს ხსენება. „განსაკუთრებულს“ „რეალის“ ხელმძღვანელობასთან შესანიშნავი ურთიერთობა აქვს და პირად ინტერვიუებშიც არაერთხელ უთქვამს, რომ თუ შეთავაზებას მიიღებს, ბერნაბეუზე დაბრუნდება.