ესპანური გამოცემები დანი სებალიოსთან დაკავშირებით ახალ ინფორმაციას იუწყებიან.

„რეალის“ ნახევარდაცვის ლიდერის აღდგენითი პროცესი დაგეგმილზე სწრაფად მიმდინარეობს და ის შესაძლოა მოედანს ვადაზე ადრე დაუბრუნდეს.

არსებული ცნობით, სებას აღდგენისთვის 8-იდან 10 კვირამდე სჭირდებოდა, რაც იმას ნიშნავს, რომ დაბრუნება აპრილის ბოლოს უნდა მოხდეს, თუმცა განახლებული მონაცემების მიხედვით, ესპანელი შესაძლოა ვარჯიშს 10 აპრილიდან დაუბრუნდეს.

თუ სება 15-17 დღეში დაბრუნდება, ის ლონდონის „არსენალის“ წინააღმდეგ ჩემპიონთა ლიგის განმეორებით დაპირისპირებაში მონაწილეობის მიღებას შეძლებს.

კარლო ანჩელოტის სამწვრთნელო შტაბი გახარებულია და სამედიცინო სამსახურის წარმომადგენლებთან ინტენსიურ კონსულტაციებს გადის.

თავად სებალიოსი ყოველდღიურ რეჟიმში ვარჯიშობს, ის საწვრთნელ ბაზაზე ყოველი დილით 10:00 საათზე მიდის და  სხვადასხვა სახის პროცედურებას იტარებს. დანი დღეში 5-იდან 7 საათამდე ვარჯიშობს იმისთვის, რომ დროულად დაბრუნდეს.