მიკელ მერინო ესპანეთის ნაკრებთან ერთად ვარჯიშობს. ესპანელმა ფეხბურთელმა ჟურნალისტებთან ინტერვიუში „არსენალისა“ და სამეფო კლუბის დაპირისპირებაზე ისაუბრა.

„მას შემდეგ, რაც გავიგეთ, რომ 1/4 ფინალში მადრიდის „რეალს“ ვუპირისპირდებით, ჩემმა არაერთმა თანაგუნდელმა მკითხა „მერენგების“ შესახებ. ყველას აინტერესებს, როგორია ბერნაბეუზე თამაში და რამდენად რეალურია ლეგენდები, რომელიც ამ არენაზე დადის.“

„მე ზუსტად ვიცი, რამდენად რთულია მადრიდში თამაში, კარგი და მრავლისმომცველი ინფორმაცია აქვს მარტინ ოდეგორსაც, რომელიც „რეალის“ რიგებში ირიცხებოდა და კარგად იცის, რა სტანდარტებია „რეალში“.“

„ერთადერთი რაც შემიძლია გითხრათ ის არის, რომ „არსენალი“ წლებია ჩემპიონთა ლიგის ფინალისთვის იბრძვის და ჩვენ გვაქვს გეგმა, რომელსაც მივყვებით.“

„ვაცნობიერებთ, რამდენად რთული დასამარცხებელია ანჩელოტის კოლექტივი, თუმცა თუ ლიგის მოგება გვსურს, ნებისმიერი გამოწვევისთვის მზად უნდა ვიყოთ.“