ანჩელოტი:„ფედე ბრუნდება“
კარლო ანჩელოტიმ ლა ლიგის 27-ე ტურის წინ პრესკონფერენცია გამართა.
„საკმაოდ სოლიდური მეტოქე გვყავს. „რაიო ვალეკანო“ მამაცი გუნდია, რომელიც თამაშობს ინტენსიურ და სანახაობრივ ფეხბურთს. მიმდინარე სეზონში ამ გუნდის წინააღმდეგ ასპარეზობა ყველას უჭირს, თუმცა უნდა აღინიშნოს, რომ 3 ქულის მოპოვება სასიცოცხლოდ მნიშვნელოვანია, ამიტომ ჩვენ უნდა გავიმარჯვოთ.“
„თითოეულ ფეხბურთელთან მაქვს ინდივიდუალური ურთიერთობა და ვცდილობ, ყველაფერი ვიცოდე, მათი ფსიქოლოგიური და ფიზიკური მდგომარეობის შესახებ.“
„ზოგიერთ თამაშში ლიდერი მბაპეა, ზოგიერთი ვინისიუსი, როდრიგო, ან ჯუდ ბელინგემი. მთავარი კი გუნდის წარმატებაა და ყველა ფეხბურთელი ამისთვის იბრძვის.“
„ფედე ვალვერდემ აღდგენითი პროცესი დაასრულა და „რაიო ვალეკანოსთან“ სათამაშოდ მზად არის. ურუგვაელ ფეხბურთელს „რეალში“ არაერთ პოზიციაზე უთამაშია, მან ბოლო დროს მარჯვენა მცველადაც სცადა ასპარეზობა, ვინაიდან გუნდს სჭირდებოდა, თუმცა მერწმუნეთ, სამხრეთ-ამერიკელისთვის საუკეთესო პოზიცია ნახევარმცველია. ამ საკითხზე მე და ვალვერდეს არ გვიკამათია.“
„ფლორენტინო პერესს დაბადების დღე მივულოცე და ვუსურვე, რომ დღევანდელი დღით დიდი სიამოვნება მიიღოს. ჩვენ შეგვიძლია მას კარგი საჩუქარი გავუკეთოთ და „რაიოსთან“ გავიმარჯვოთ.“
„სევილიაში ძალიან ცუდად ვითამაშეთ და ადგილობრივ „ბეტისთან“ დავმარცხდით. საბედნიეროდ, ეს იყო კონკრეტული მომენტის ჩავარდნა და არა გრძელვადიანი. ახლა კარგ ფორმაში ვართ და ვეცდებით, თამაშები მოვიგოთ.“
„გუნდს დასვენებისთვის საკმარისი დრო ჰქონდა. მივიჩნევ, რომ „რაიოს“ სათანადოდ დავხვდებით.“
„ედუარდო კამავინგამ ტრავმების გამო ჯამში 3 თვე და 2 კვირა გამოტოვა, ეს მცირე დრო არ არის. ამას დაემატა ზურგის ტკივილები, რაც მას სრულფასოვნად ასპარეზობის საშუალებას არ აძლევდა. ფრანგს მეტი შეუძლია და მჯერა, რომ სეზონის გადამწყვეტ ეტაპზე მოწოდების სიმაღლეზე იდგება.“
„მბაპე ხარისხიანი მოთამაშეა და კრიტიკას არ იმსახურებს. კილიანი „ატლეტიკოსთან“ პირველ მატჩში არ ყოფილა ისეთივე ეფექტური, როგორიც „სიტისთან“, მაგრამ ამაში არანაირი პრობლემა არ არის.“
„მოდრიჩს შეუძლია ითამაშოს ხვალ, შემდეგ კი ფორმა აღიდგინოს და „ატლეტიკოსთანაც“ შესანიშნავად გამოვიდეს. ხორვატის ასაკი არ არის ის კომპონენტი, რომელიც მაშინებს, რადგან ის საოცარ ფორმაშია.“
„როდრიგო გუნდს ყველა მიმართულებით ეხმარება. ბრაზილიელმა ფეხბურთელმა ბოლო დროს დაცვითი კომპონენტი მნიშვნელოვნად გააძლიერა.“
- 8 მარტი 2025
- 991
- 10
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.
