ესპანური გამოცემების ცნობით, არდა გიულერი მადრიდის „რეალს“ 2025 წლის ზაფხულში იჯარის წესით დატოვებს.

გამომდინარე იქედან, რომ თურქ ფეხბურთელს ბევრი დრო არ ეძლევა, მისი ოჯახი ესპანეთის დედაქალაქის დროებით დატოვებაზე დაფიქრდა.

აქამდე არდას პოზიცია მტკიცე იყო, თუმცა როგორც ჩანს, ახლა ვითარება იცვლება.

არდას ხშირად ამსგავსებენ მარტინ ოდეგორს, რომელიც „ბლანკოსში“ 16 წლის ასაკში მოხვდა, თუმცა არაერთ კლუბში წავიდა იჯარით და საბოლოო ჯამში ბერნაბეუზე ვეღარ დაბრუნდა. ახლა ნორვეგიელს „არსენალში“ მშვენიერი კარიერა აქვს, თუმცა მისი მადრიდული ოცნება ვერ შედგა, არდას კი მოვლენების მსგავსი განვითარება არ სურს.

არსებული ცნობით, გიულერს არაერთი ჩემპიონატიდან ეპატიჟებიან, მის მიმართ ყველაზე დიდი ინტერესი გერმანიის ბუნდესლიგიდან მოდის, თუმცა ასევე არსებობს იტალიური კლუბების ინტერესიც.

კონკრეტულად, სერია „ა“-დან გიულერს 2 შეთავაზება აქვს, მისი სამსახურით „მილანი“ და „რომა“ არიან დაინტერესებულები. რაც შეეხება გერმანიას, მადრიდელ ახალგაზრდას კარიერის დროებით გაგრძელება შეუძლია „დორტმუნდში“, ფრანკფურტის „აინტრახტსა“ და „ლაიფციგში“.

და ბოლოს. არსებული ცნობით, თურქი ფეხბურთელის დამატებაზე პრეტენზია ესპანურ „ვილიარეალსაც“ აქვს.