ვინისიუს ჟუნიორმა ჩემპიონთა ლიგის 1/8 ფინალის პირველი დაპირისპირების წინ პრესკონფერენცია გამართა.

„ჩვენ ყველაფერი უნდა გავაკეთოთ ბერნაბეუს დაპირისპირების მოსაგებად და მეორე მატჩისთვის კომფორტული სხვაობის შესაქმნელად. ბერნაბეუზე შეკრებილი პუბლიკისა და ფეხბურთელების ქიმია ყოველთვის განსაკუთრებულია. მჯერა, რომ კარგი საღამოა გამოვა და გავიმარჯვებთ. ჩვენ ჩემპიონთა ლიგაზე დიდი გამოცდილება გვაქვს და ვიცით, როგორ ვითამაშოთ რთული მატჩები.“

„მსაჯებზე საუბარი საერთოდ არ მსურს, მაგრამ ხანდახან ეს გარდაუვალია. ევროპაში მსაჯები ყოველთვის უფრო მაღალ დონეზე არიან და უხეშობისთვის შესაბამის სანქციებს აწესებენ.“

„საუდის არაბეთში გადასვლა? ძალიან მშვიდად ვარ. კლუბთან 2027 წლამდე მაკავშირებს კონტრაქტი და მინდა, რომ კიდევ გავახანგრძლივო. ევროპაში ამაზე კარგი ადგილი არ არსებობს, აქ არიან საუკეთესო ფეხბურთელები და გუნდს მართავს საუკეთესო პრეზიდენტი.“

„„რეალთან“ ვალში ვარ. ის, რომ დღევანდელ დღემდე მოვედი, სწორედ სამეფო კლუბის დამსახურებაა, რომელმაც განვითარების საშუალება მომცა. ამ კლუბში ბევრი რამ ვისწავლე.“

„ოქროს ბურთი? ეს არასდროს ყოფილა ჩემი მთავარი პრიორიტეტი, მაგრამ ბუნებრივია, როდესაც გამარჯვებასთან ახლოს ხარ, გინდა რომ გაიმარჯვო.“

„რატომ არ დავესწარი France Football-ის ღონისძიებას? ეს იყო კლუბის ერთიანი პოზიცია, რომელიც გავიზიარე და ესპანეთის დედაქალაქში დარვრჩი.“

„დარწმუნებული ვარ, „ატლეტიკოსთან“ ორივე შეხვედრა საფეხბურთო ზეიმი იქნება. როგორც ბერნაბეუზე, ასევე „მეტროპოლიტანოზე“ დიდ მატჩებს ველი.“

„საუკეთესო კონდიციაში ვარ და მივიჩნევ, რომ სეზონის გადამწყვეტ ეტაპზე გუნდს დიდ დახმარებას გავუწევ. ტრავმები არ მაწუხებს და ვარჯიშებზე ბოლომდე ვიხარჯები.“

„ანჩელოტი ყოველთვის გვეუბნება, რომ გუნდს დაცვაში უნდა დავეხმაროთ. მაქსიმალურად ვცდილობ, აღნიშნული კომპონენტი გავაუმჯობესო და უკანახაზელს დავეხმარო მაშინ, როდესაც ამის საჭიროება არსებობს.“

„ემოციები? 24 წლის ვარ და კიდევ ბევრი მაქვს სასწავლი, თუმცა მერწმუნეთ, მოედანზე ყოფნის დროს ძალიან რთულია ემოციების შეკავება, თანაც მაშინ, როდესაც შენს წინააღმდეგ საშინლად უხეშობენ.“

„„ბეტისთან“ შეხვედრა მშვენივრად დავიწყეთ, მაგრამ შემდეგ ყველაფერი ცუდად წარიმართა. გუნდს არ ჰქონდა ერთიანი სული, ყველა რგოლში პრობლემა იყო და საბოლოო ჯამში სამართლიანდ დავმარცხდით. ჩვენ ლა ლიგაში ბრძოლას გავაგრძელებთ.“