ესპანური გამოცემები ერთხმად თანხმდებიან, რომ დანი სებალიოსს ამ სეზონში საკმაოდ კარგი მატჩები აქვს.

ესპანელი ფეხბურთელი სხვადასხვა ტურნირზე 20-ჯერ გავიდა მოედანზე და 900 წუთამდე ითამაშა, რაც ბევრი ნამდვილად არ არის, მაგრამ როდესაც ის მოედანზეა, „რეალი“ გაცილებით გააზრებულ და მრავალფეროვან ფეხბურთს თამაშობს.

დანიმ ბოლო 2 თვეში დიდი პროგრესი აჩვენა, რაც მის სათამაშო დროზეც აისახა.

როდესაც სებალიოსი მოედანზეა „ბლანკოსი“ ბევრ გოლს იტანს, ნახევარდაცვაში მწყობრად თამაშობს და უფრო მეტად გააზრებულ კომბინაციებს გვთავაზობს.

საფეხბურთო ინტელექტი ამ მოთამაშეს ყოველთვის ჰქონდა, თუმცა ამ სეზონში მართლაც მეტად გამოჩნდა შესაძლებლობები, რომელიც მას აქვს. ეს ყველაფერი კი პირველ რიგში იმ ფონზე, რომ გუნდი ტონი კროოსის დანაკლისის შევსებას ცდილობს და სწორედ ისეთი მოთამაშე სჭირდება ნახევარდაცვაში, რომელიც მეტად ესტეტიურია და გუნდის თამაშს სწორად წარმართავს.

დანი „ლას პალმასთანაც“ სასტარტო შემადგენლობაში იყო და სტატისტიკის მიხედვით, ყველაზე ზუსტი სწორედ ის გახლდათ. სება არ ცდება, როგორც მოკლე, ასევე გრძელი გადაცემების დროს, ხშირად იწყებს შეტევებს გონივრულად და ცდილობს ნახევარდაცვა უფრო მობილური გახადოს.

„ას“-ის ინფორმაციით, ანჩელოტის ესპანელი ფეხბურთელის თამაში ძალიან მოსწონს და სეზონის მეორე ნახევარში კიდევ უფრო მეტი შანსის მიცემას გეგმავს.