ესპანური გამოცემების ცნობით, ალფონსო დეივისმა სპეკულაციები დაიწყო, რამაც მადრიდის „რეალის“ ხელმძღვანელობა ძალიან გააბრაზა.

გუშინ საღამოს მიუნხენის „ბაიერნის“ ხელმძღვანელობამ განაპირა მცველს სწორედ ის კონტრაქტი შესთავაზა, რომელსაც მოთამაშე ითხოვდა.

ახალი წინადადებით მნიშვნელოვნად იზრდება ალფონსოს ხელფასი და ბონუსების სისტემა. ამ ნაბიჯით „რეკორდმაისტერმა“ კიდევ ერთხელ სცადა ფეხბურთელის დაყოლიება.

ალფონსო კი „რეალს“ დაუკავშირდა და უთხრა, რომ „ბაიერნისგან“ ახალი წინადადება აქვს და სწორედ ამ კონტრაქტის იდენტურ შეთანხმებას ითხოვს „ბლანკოსთანაც“.

აღნიშნულმა ქმედებამ სამეფო კლუბი ძალიან გააბრაზა.

„მარკას“ ინფორმაციით, პერესის დავალებით შესაბამისმა ჯგუფმა ფეხბურთელის აგენტს აცნობა, რომ „რეალი“ პოზიციას არ ცვლის და წამოწყებული კომუნიკაცია, რომელიც გაუმჯობესებულ კონტრაქტს უკავშირდება არასერიოზულია.

ესპანური გამოცემების ცნობით, დღევანდელი მოცემულობით, დეივისის ბერნაბეუზე თამაშის შანსი მნიშვნელოვნად შემცირდა.