ფედე ვალვერდემ „ელ კლასიკოს“ წინ პრესკონფერენცია გამართა.

„ჩვენ კიდევ ერთი მნიშვნელოვანი ფინალი გვაქვს ჩასატარებელი. გუნდმა მიიღო შანსი, 2025 წელი ტიტულით დაიწყოთ, ამისთვის ყველაფერი უნდა გავაკეთოთ და მადრიდში გამარჯვებულები დავბრუნდეთ.“

„ყველა მატჩში თამაში? მზად ვარ ამისთვის და დიდი მადლობა მწვრთნელს, რომელიც დიდ ნდობას მიცხადებს. „ლა კოპაზე“ 45 წუთი დავისვენე, ეს სრულიად საკმარისია, ენერგიით სავსე ვარ.“

„დასვენების დრო ივლისშიც მოვა, ახლა საქმის კეთების დროა.“

„დანი ოლმოსა და პაუ ვიქტორის დარეგისტრირების შესახებ ვერანაირ კომენტარს ვერ გავაკეთებ. ვფიქრობ, ამაზე საუბრის დრო აქ არ არის და ჩემს კომპეტენციას ცდება ისეთი საკითხები, როგორებიც ფეხბურთელების დარეგისტრირება და კლუბების მხრიდან გადასადგმელი ნაბიჯებია.“

„„მალიორკასთან“ მატჩის შემდეგ კარგად დავისვენე და ენერგიის აღდგენა შევძელი. თქვენ წარმოიდგინეთ, მშვიდი ძილი მქონდა, სასტუმროში ბავშვები არ ხმაურობდნენ და სიმშვიდის შეგრძნებამ ორმაგი ენერგია მომცა (იცინის).  დარწმუნებული ვარ, „ელ კლასიკოს“ სამეფო კლუბის ყველა ფეხბურთელი მოწოდების სიმაღლეზე შეხვდება.“

„ჩემი ცოლის ტვიტის გამო, ანჩელოტისთან არასდროს მქონია უთანხმოება. მთავარმა მწვრთნელმა იცის, რომ შეუძლია ჩემი იმედი ჰქონდეს, ჩვენი ურთიერთობა ჰარმონიულია.“

„2020 წლის სუპერთასი და მორატას მომენტი საფეხბურთო ისტორიას დარჩა. არ ვიცი, ეს კარგი მომენტი იყო, თუ ცუდი, თუმცა მას შემდეგ ჩემი ცნობადობა გაორმაგდა.“

„„ელ კლასიკოში“ ყველას უნდა ვაჩვენოთ, რომ მსოფლიოს საუკეთესო კლუბი ვართ. ახალი წლის ტიტულით დაწყება დიდი მუხტი იქნება.“

„მბაპეს რჩევებს ვერ მივცემ. ფრანგი ფეხბურთელი მსოფლიო ჩემპიონია და პლანტის მასშტაბით ერთ-ერთი საუკეთესო ფეხბურთელის სტატუსით სარგებლობს. ჩემი აზრით, მას არავის რჩევა არ სჭირდება, გავა მცირე დრო და კილიანი ამას ყველას აჩვენებს.“

„როდესაც „ბარსელონასთან“ 0-4 წავაგეთ, ძალიან ცუდად მეძინა, ამაზე ადრეც ვისაუბრე. უმძიმესი დარტყმა მივიღე, ახლა კი სიტუაციის გამოსწორების დროს ვხედავ, ჩვენ უნდა გავიდეთ მოედანზე და გავიმარჯვოთ.“