ესპანური გამოცემების ცნობით, მადრიდის „რეალმა“ რაულ ასენსიოსთან ახალ კონტრაქტზე მუშაობა დაიწყო.

ფლორენტინო პერესი თვლის, რომ ესპანელი კანტერანო შანსს იმსახურებს და გუნდი მას წაახალისებს.

არსებული ინფორმაციით, მადრიდული გრანდი ესპანელ უკანახაზელს, რომელიც თებერვალში 22 წლის გახდება 5 წლიან ხელშეკრულებას შესთავაზებს, რომელიც ძალაში 2030 წლის 30 ივნისამდე იქნება.

რაულ ასენსიოს ფასი დეკემბრის მონაცემებით 7.5 მილიონ ევრომდე გაიზარდა, ის გაიცნო არამხოლოდ ესპანურმა ფეხბურთმა, არამედ მთელმა მსოფლიომ.

მადრიდში მიიჩნევენ, რომ გუნდში დავიდ ალაბას, ანტონიო რუდიგერის, ედერ მილიტაოს და რაულ ასენსიოს ყოფნა ცენტრალური დაცვისთვის სრულიად საკმარისია. ამას ემატება ორელიან ჩუამენის კანდიდატურაც, რომელიც საჭიროების შემთხვევაში დაცვის ცენტრში კარგად თამაშობს, თუმცა არავინ იცის, დარჩება თუ არა ის გუნდში მომავალ სეზონში.

„ბლანკოსი“ ზაფხულში ხესუს ვალიეხოს გაუშვებს და ზემოხსენებული მცველების იმედზე დარჩება.

ესპანელების ცნობით, ფლორენტინო პერესი ცენტრალურ მცველს მხოლოდ იმ შემთხვევაში დაიმატებს, თუ ამის კარგი პერსპექტივა დარჩება და სატრანსფერო ღირებულება გონივრულ საზღვრებს არ გაცდება.

რაც შეეხება რაულის მიმდინარე კონტრაქტს, მას სამეფო კლუბთან ხელშეკურლება 2026 წლის 30 ივნისს ეწურება, ახალა კონტრაქტთან ერთად კი გაიზრდება ფეხბურთელის შემოსავლებიც.

თავად ფეხბურთელი საკუთარ შესაძლებლობებში დარწმუნებულია და მიიჩნევს, რომ ბერნაბეუზე დარჩენა და გამოცდილ ფეხბურთელებთან ერთად თამაში კარიერულ განვითარებაში შეუწყობს ხელს.