მადრიდის „ატლეტიკომ“ აშკარად გაიღვიძა. როგორც ლა ლიგაში, ასევე ჩემპონთა ლიგაზე, დიეგო სიმეონეს გუნდი საკმაოდ ხარისხიან და შედეგზე ორიენტირებულ ფეხბურთს აჩვენებს.

„როხიბლანკომ“ დღეს 0-5 დაამარცხა „ვალიადოლიდი“ და 15 ტურის შემდეგ 32 ქულას მოუყარა თავი, რაც იმას ნიშნავს, რომ „ბარსელონასთან“ ჩამორჩენა 2 ქულა აქვს.

„რეალი“ დღეს მე-14 მატჩს ითამაშებს და ეცდება, რომ 33 ქულა მოიპოვოს, რაც იმას ნიშნავს, რომ მეორე ადგილს დაიბრუნებს და კიდევ ერთი სარეზერვო შეხვედრის გამო ესპანეთის შიდა პირველობის პოტენციური ლიდერი იქნება.

მადრიდული გამოცემები ერთხმად მიუთითებენ, რომ ხულიან ალვარესის, სორლოტის და სხვების ადაპტაცია უკვე დასრულდა და გუნდი სწორედ ახლა იწყებს იმ ფეხბურთის ჩვენებას, რომელიც ჩოლოს სტარტზევე სურდა.