ენდრიუ რობერტსონმა „რეალთან“ დაპირისპირებასთან დაკავშირებით პრესკონფერენცია გამართა.

„2022 წლის ფინალს ვერ ვივიწყებ. ჩვენ გვქონდა აბსოლუტური უპირატესობა, ინიციატივა, რესურსი და შემართება, მაგრამ ტიბო კურტუას საოცარმა თამაშმა შედეგი ანჩელოტის გუნდს მოუტანა და ჩვენ ვერცხლის მედლებს დავჯერდით.“

„მე არ ვიცი, როგორ განვითარდება მოვლენები „ენფილდზე“, მაგრამ მივიჩნევ, რომ „რეალის“ დამარცხების დრო მოვიდა და ჩვენ მორიგი 3 ქულა უნდა ჩავიწეროთ აქტივში.“

„სატურნირო თვალსაზრისით მეტი მოტივაცია „ბლანკოსს“ უნდა ჰქონდეს, მაგრამ ამ ეტაპზე ეს ჩვენთვის მნიშვნელოვანი არ არის. „ლივერპული“ საშინაო არენაზე ყოველთვის მოწოდების სიმაღლეზე დგას და ასე უნდა იყოს ახლაც.“

„ტრენტი? ის დიდებული პარტნიორი და მეგობარია. ინგლისელი ფეხბურთელი მოედანს უბრუნდება, თუმცა ბოლომდე მზად არ არის, ამიტომ სასტარტოში სხვა ფეხბურთელს იხილავთ, შემადგენლობის ფორმირება მწვრთნელის საქმეა.“

„სალაჰი? ის შესანიშნავ ფორმაშია, რასაც ამტკიცებს, როგორც პრემიერლიგაში, ასევე ევროსარბიელზე. მოჰამედზე ბევრი რამ იქნება დამოკიდებული.“

„ის, რომ „რეალს“ შემადგენლობაში პრობლემები აქვს, ჩვენს საქმეს არ ამსუბუქებს. როდესაც მოედანზე მბაპე, ბელინგემი, ვალვერდე და სხვები იქნებიან, ხიფათის შექმნის პრობლემა ნამდვილად არ იარსებებს.“