ესპანური გამოცემების ცნობით, მადრიდის „რეალს“ ლუკა მოდრიჩის შემცვლელი ნაპოვნი ჰყავს და 70 მილიონიან გარიგებაზე საუბარს იანვრიდან გეგმავს.

ნიკოლო ბარელა სამეფო კლუბის რადარზეა და ფლორენტინო პერესს სურს, რომ ნახევარმცველი მადრიდისტა გახდეს.

ბარელას საფეხბურთო ინტელექტი მადრიდში ძალიან მოსწონთ, ამას ემატება გამოცდილება, რომელიც იტალიელმა ფეხბურთელმა როგორც კლუბში, ასევე ნაკრებში უხვად მიიღო.

მილანის „ინტერის“ ფეხბურთელის სანაცვლოდ ფლორენტინო პერესი 70 მილიონი ევროს გადახდას გეგმავს.

არსებული ინფორმაციით, „ნერაძურის“ ხელმძღვანელობას მეტის მიღება სურს, მაგრამ ყველაფერი მოლაპარაკებების წარმოების შემდეგ გამოიკვეთება.

რაც შეეხება მოდრიჩს, ხორვატ ფეხბურთელს „მერენგებთან“ კონტრაქტი 30 ივნისს ეწურება. მადრიდში მიიჩნევენ, რომ ეპოქის დასრულება ახლოვდება, მაგრამ ბარელას საჭიროება გუნდში იმ შემთხვევაშიც იქნება, თუ ლუკიტა კიდევ 1 წლით გაახანგრძლივებს.