კარლო ანჩელოტიმ „ლილთან“ დაპირისპირების წინ პრესკონფერენცია გამართა.

„პირველ რიგში უნდა აღვნიშნო, რომ მოძალადე ხალხის ადგილი სტადიონებზე არ არის და რაც „ატლეტიკოს“ სტადიონზე მოხდა სრულიად მიუღებელია, როგორც ჩემთვის, ასევე „რეალის“ ყველა ფეხბურთელისთვის. მსგავსი ქმედება არის ფეხბურთის სირცხვილი, რომელიც პირდაპირ აისახება სპორტის ამ სახეობის პრესტიჟზე.“

„„ლილი“ საკმაოდ კარგი გუნდია, რომელმაც შარშან საფრანგეთის ჩემპიონატში სანახაობრივი ფეხბურთი ითამაშა და საბოლოო ჯამში ჩემპიონთა ლიგის საგზურიც მოიპოვა. ჩვენ ვიცით, რომ ფრანგულ გუნდს ბურთის ფლობა უყვარს და ჩვენთან დაპირისპირებაშიც ამას ეცდება.“

„ტონი კროოსი შეუცვლელი ფეხბურთელია. გერმანელის შეცვლაზე ფიქრი შორს წაგვიყვანს, ჩვენ უბრალოდ სქემა უნდა შევცვალოთ და ვეცადოთ, მის გარეშე თამაში ვისწავლოთ.“

„მოდრიჩი? ის დერბიში საუკეთესო იყო. ლუკა მართლაც ერთადერთია ვისაც ტონის სტილში  შეუძლია ბურთის დაჭერა და განაწილება.“

„არდა  გიულერს მადრიდის „რეალში“ დიდი როლი აქვს.  თურქს გაცილებით მეტი დრო ეძლევა, ვიდრე შარშან ეძლეოდა და ეს მაჩვენებლები კიდევ მოიმატებს.“

„მბაპე ძალიან სწრაფად გამოჯანმრთელდა და გუნდთან ერთად სრულფასოვანი ვარჯიშის ჩატარებას ახერხებს. არ გამოვრიცხავ, მას თამაშის საშუალება მივცე. რისკი? თუ რისკი იარსებებს, კილიანი სკამზე დარჩება.“