კარლო ანჩელოტიმ „ალავესის“ დამარცხების შემდეგ პრესკონფერენცია გამართა.

„არ ვიცი რა პოლიტიკაა ეს, თუმცა მცირე საუბარზეც კი ფეხბურთელები ყვითელ ბარათებს იღებენ. ძალიან უკმაყოფილო ვარ მსაჯის გადაწყვეტილებებით, ვინაიდან ამ ადამიანმა ნახევარ გუნდზე მეტი გააფრთხილა.“

„მოდრიჩის გაფრთხილება? არ ვიცი, ეს მსაჯს ჰკითხეთ.“

„ენდრიკის მომენტი ახლოდან არ დამინახავს, ზუსტ შეფასებას ვერ გავაკეთებ, თუმცა ისიც გააფრთხილეს.“

„ჯაკობო მოედანზე შემყავდა, მაგრამ 2 წუთში 2 გოლი მივიღეთ საკუთარ კარში, სწორედ ამიტომ, მივიჩნიე, რომ ახალგაზრდისთვის ეს წნეხი მძიმე იქნებოდა. მოედანზე რუდიგერი დავტოვე.“

„სანაკრებო შესვენების შემდეგ გუნდმა კარგად თამაში დაიწყო, მთავარი ის არის, რომ პროგრესი გრძელდება. ჩვენ არ ვაპირებთ ტემპის დაგდებას და „ატლეტიკოსთან“ კიდევ უფრო ხარისხიანი ფეხბურთის ჩვენებას ვგეგმავთ.“

„300 დაპირისპირება „რეალში“?  როდესაც სამეფო კლუბს დავტოვე, თითოეული შეხვედრით ვიამაყებ. ეს ციფრი ნამდვილად ბედნიერს მხდის, თუმცა მივიჩნევ, რომ  მთავარი შედეგებია.“

„კალენდარი ძალიან მომთხოვნია. დასვენების დრო ფაქტობრივად არ არის, თუმცა როგორც ადრე გითხარით, ამ სეზონში აბსოლუტურად ვერაფერს შევცვლით. უნდა შევეგუოთ, რომ შემოდგომის ბოლომდე სანაკრებო წყვეტები იქნება და ფეხბურთელებს მოუწევთ მრავალსაათიანი ფრენები.“

„მბაპეს მარცხენა ფეხზე დისკომფორტი ჰქონდა და ექიმები აკვირდებიან. ვიმედოვნებ, ფრანგთან დაკავშირებით სერიოზული არაფერია, მაგრამ არ ვიცი, შეძლებს თუ არა მადრიდულ დერბიში მონაწილეობის მიღებას.“

„მსაჯთან საუბარი? აბსოლუტურად ლეგიტიმური უფლება მქონდა მისთვის მეკითხა, რატომ მიიღო ჩემმა ექვსმა ფეხბურთელმა გაფრთხილება სრულიად უწყინარ სიტუაციაში.“

„ვალიეხოს თამაში? ვფიქრობ, მილიტაო დასვენებას იმსახურებდა, ესპანელი კი შანსს.“

„გუნდმა 60 წუთის მანძილზე უნაკლოდ ითამაშა, შემდეგ კი შედარებით ინერტული იყო, თუმცა ეს ანგარიშიდანაც გამომდინარეობდა.“

„ბელინგემმა სრულფასოვანი თამაშის ჩატარება შეძლო. ინგლისელი პროგრესირებს და მიხარია, რომ დაზიანების შემდეგ ფორმაში ჩადგომას ახერხებს.