გუშინ საღამოს, მადრიდში, სანტიაგო ბერნაბეუზე ძალიან საინტერესო მატჩი გაიმართა. ერთმანეთის პირისპირ, ადგილობრივი მადრიდის „რეალი“ და პამპლონის „ოსასუნა“ წარსდგნენ. შეხვედრა საკმაოდ დაბალ ტემპში მიმდინარეობდა, მაგრამ მატჩი საკმაოდ საინტერესო სცენარით წარიმართა. რაც მთავარია, შედგა ჟოზე მაურინიოს დებიუტი, რომელმაც თავისი პირველი საშინაო მატჩი დამაჯერებელი გამარჯვებით აღნიშნა (1-0).

მაურინიოს საყვარელი ფეხბურთელი, რიკარდო კარვალიო გუშინდელ მატჩში ძალიან მაღალ დონეზე ასპარეზობდა. პორტუგალიელმა მცველმა, როგორც თავისი უშუალო მოვალეობები ასევე ფორვარდის ფუნქციებიც ბრწყინვალედ შეითავსა და მეტოქის კარში უმნიშნველოვანესი გოლის გატანა მოახერხა. სწორედ კარვალიოს ერთადერთი გოლის წყალობით მოახერხეს მადრიდელებმა შეხვედრის მოგება და ქულათა მარაგის შევსება.

მატჩის შედეგი, მოედანზე განვითარებულ მოვლენებს ნაკლებად ასახავს. ერთი შეხედვით შეიძლება მოგეჩვენოთ, რომ მადრიდელებს მეტოქის დამარცხება გაუჭირდათ და შეხვედრა თანაბარ ბრძოლაში მიმდინარეობდა, მაგრამ არა, პირიქით მასპინძლებმა მატჩისთვის განკუთვნილი დროის 90% მეტოქის ნახევარზე გაატარეს, მაგრამ მხოლოდ ერთი გოლის გატანა მოახერხეს.