კარლო ანჩელოტიმ „ესპანიოლთან“ დაპირისპირების წინ პრესკონფერენცია გამართა.

„„ესპანიოლთან“ შეხვედრისთვის გუნდი სრულფასოვნად მოემზადა. როტაცია გამორიცხული არ არის, მაგრამ ახლა ვერ გეტყვით, როგორ შემადგენლობას დავაყენებ. ვეცდებით, მოედანზე საუკეთესო თერთმეტეული გავიყვანო და 3 ქულა ჩავიწეროთ აქტივში.“

„ბოლო 2 დაპირისპირება მოვიგეთ და საკმაოდ კარგი დინამიკა გვაქვს. ვფიქრობ, გუნდი კიდევ მოუმატებს და ბერნაბეუზე ხარისხიან ფეხბურთს აჩვენებს.“

„4 ნახევარმცველი? არ გამოვრიცხავ, ასეც მოვიქცე, თუმცა ეს არ არის გარანტი იმისა, რომ ბალანსს ვიპოვით. 2022 წელს „ბლანკოსი“ 4-3-3 სქემით თამაშობდა, მაგრამ ბალანსის პრობლემა არ გვქონდა.“

„ფანები ბედნიერები არიან მაშინ, როდესაც გუნდი იმარჯვებს. ვეცდებით, მომდევნო დაპირისპირებებში მათ სიამოვნებას მივანიჭოთ.“

„ჩვენ ვხდებით უკეთესები და ვაგრძელებთ მუშაობას. სეზონი ძალიან გრძელია, იქნება როგორც აღმასვლა, ასევე დაღმასვლა. ჩვენ უნდა ვეცადოთ, რომ რაც შეიძლება ცოტა ცუდი მატჩი ვაჩვენოთ და მუდამ მოწოდების სიმაღლეზე ვიდგეთ.“

„საუკეთესო ფორმაში არ ვართ, ამაზე არაერთხელ მისაუბრია, თუმცა ოქტომბერში გუნდი გაცილებით ძლიერი იქნება. შეგახსენებთ, შარშანაც ოქტომბერში მოვუმატეთ.“

„კამავინგა მომდევნო კვირიდან სრული დატვირთვით ვარჯიშს დაიწყებს. ფრანგის დაბრუნება მნიშვნელოვანია, რადგან ნახევარდაცვაში მეტი რესურსი მოგვეცემა და როტაციას განვახორციელებთ. ედუ უკვე 3 წელია გუნდის ნაწილია და ძალიან დიდ საქმეს აკეთებს.“

„დაცვაში თამაში მნიშვნელოვანია. ალბათ დააკვირდით, რომ უკანახაზელებს ვინისიუსი, როდრიგო და მბაპეც ეხმარებიან. გუნდი მობილურია და ეს ძალიან მომწონს.“

„„შტუტგარტთან“ დაცვაში თამაში გაგვიჭირდა, მაგრამ მეორე ნახევარში ბევრი რამ შევცვალეთ. ვეცდებით, შეცდომები არ გავიმეოროთ.“

„კრიტიკა ჩემპიონთა ლიგაზე? როდესაც ვიგებთ გვაკრიტიკებენ და როდესაც ვაგებთ გვაკრიტიკებენ. ეს სრულიად უსაფუძვლო მგონია. როგორც გითხარით, სეზონი გრძელია. „ბარსელონამ“ წააგო, „რეალმა“ კი მოიგო, ეს კი იმას ნიშნავს, რომ კატალონიურ გუნდს არანაირი შანსი არ აქვს? რა თქმა უნდა არა. შანსი ყველას მიეცემა.“

„მომდევნო მატჩებს შორის ერთ-ერთში ენდრიკ ფელიპე სასტარტო შემადგენლობაში იქნება, მან დაიმსახურა სათამაშო დრო.“