კარლო ანჩელოტიმ „სოსიედადთან“ დაპირისპირების წინ პრესკონფერენცია გამართა.

„ვინისიუსი და მბაპე თავს ბედნიერად გრძნობენ. ვერანაირ გაუგებრობას ვერ ვხედავ. ბრაზილიელი ფეხბურთელი ფრანგ ახალწვეულს ადაპტაციაში ეხმარება.“

„ჩვენი შემტევები არანაირ კრიტიკას არ უპასუხებენ, ეს ჩვენთვის ჩვეულებრივი ფაქტია.“

„„სოსიედადი“ საკმაოდ რთული მეტოქეა. უნდა აღინიშნოს, რომ სანაკრებო პაუზის შემდეგ „რეალი“ აქტიურ ფაზაში შედის, კალენდარი საკმაოდ რთული და საპასუხისმგებლოა.“

„რა თქმა უნდა, გაკვირვებული ვიყავი, როდესააც ოქროს ბურთის 30 ნომინანტს შორის, როდრიგო გოეშის სახელი ვერ ამოვიკითხე. როგორც ჩანს, გარკვეულ წრეებში დაავიწყდათ, რამხელა წვლილი შეიტანა ბრაზილიელმა ფეხბურთელმა „ბლანკოსის“ წარმატებაში.“

„ჩუამენი და ბელინგემი „სოსიედადის“ წინააღმდეგ ვერ დაგვეხმარებიან.“

„სამედიცინო შტაბთან კონსულტაციის შემდეგ გადავწყვეტ, შევიყვანო თუ არა ფრანგი და ინგლისელი ჩემპიონთა ლიგის პირველი ტურის განაცხადში.“

„ვინისიუსი 100%-ით იხარჯება, მაგრამ საუკეთესო ფორმაში არ არის. საპანიკოს ვერაფერს ვხედავ, რადგან ის კარგად მუშაობს და სულ მალე უამრავი გოლის გატანას დაიწყებს.“

„უნდა ვეცადოთ, რომ მოვერიდოთ ტრავმებს, ეს მნიშვნელოვანი ასპექტია. წინ მომთხოვნი დაპირისპირებები გველის, სადაც ლიდერების გარეშე თამაში რთული იქნება. ვიმედოვნებ, აღდგენით პროცესში მყოფი ფეხბურთელები კოლექტივის სამსახურში მალე ჩადგებიან.“

„ვინისიუსი ბედნიერია მადრიდში. გამიკვირდება, თუ ბრაზილიელი საუდის არაბეთს აირჩევს, რადგან ყოველი დღით ტკბება, რომელსაც ჩვენთან ერთად ატარებს.“

„ვალვერდე არის ძალიან ნაყოფიერი, სწრაფი და სანახაობრივი მოთამაშე, რომელიც ლიდერია, როგორც გასახდელში, ასევე მწვანე მინდორზე. სიმორცხვე? ის მშვიდი ფეხბურთელია, თუმცა სტადიონზე ამას არ აჩენს.“

„როდესაც დაცვა კარგად ფუნქციონირებს, ნახევარმცველს და შემტევებს კარგად შეუძლიათ ბურთის ხაზიდან ხაზში გადატანა.  ეს არის მთავარი და ვფიქრობ, ამ დღეებმა გარკვეული შედეგები უნდა მოგვცეს.“

„მცირე ცვლილებები იქნება. ჯერ-ჯერობით არ მომიფიქრებია, ვათამაშო თუ არა ბრაჰიმ დიასი ან არდა გიულერი.“

„ანტონიო რუდიგერმა 5 დღე დაისვენა, შემდეგ კი სრული დატვირთვით ვარჯიშს შეუდგა, ის ენერგიით სავსეა.“

„გასახდელში ჯანსაღი და მეგობრული ატმოსფერო გვაქვს. ჩვენ ვიცით, რომ ამის გარეშე წარმატება არ მიიღწევა.“