კილიან მბაპემ „ბეტისთან“ გამარჯვების შემდეგ ჟურნალისტებთან ისაუბრა.

„ძალიან ბედნიერები ვართ გამარჯვებით. „ლას პალმასთან“ წაბორძიკების შემდეგ გუნდი ძალიან ცუდ ხასიათზე იყო, მაგრამ ვიცოდით, რომ გამარჯვება აუცილებლად დაგვრჩებოდა, ვინაიდან ბერნაბეუზე ვთამაშობდით, ეს სტადიონი კი მაგიურია.“

„მთავარი გამარჯვებაა და არა ინდივიდუალური გოლები, მაგრამ მეტოქის კარის აღება ძალიან მჭირდებოდა. პირველი გოლის შემდეგ ჩემი მოტივაცია კიდევ უფრო გაიზარდა, შემდეგ კი პენალტი დაინიშნა. ვინისიუსი საჯარიმოში დაეცა და ეჭვი არ მეპარებოდა, რომ ამ მომენტს გამოიყენებდა, თუმცა მან დამიძახა და მითხრა, რომ მე დამერტყა, თვითონ კი ნიშნულთან არ მივიდოდა. ეს დიდი სიხარული იყო, რომელსაც ბრაზილიელს არ დავუვიწყებ.“

„პირველი გოლის მომენტში ფედერიკო ვალვერდეს პასი საოცარი გახლდათ. ურუგვაელი ფეხბურთელი გუნდისთვის ძალიან ბევრს ნიშნავს.“

„ბავშვობაში ბევრჯერ მიოცნებია ბერნაბეუს ოვაციებზე და ამ საღამოს ეს ამიხდა. საოცარი ქომაგები გვყავს და მათთვის ბოლომდე უნდა დავიხარჯოთ.“

„ეჭვი არ მეპარება, ამ სეზონში არაერთი დიდი გუნდის დამარცხებას შევძლებთ. ჩვენი სტარტი ეფექტური არ იყო, მაგრამ ყველაფერი პროგრესირებს.“

„ჩემსა და ვინის შორის გაუგებრობა არასდროს ყოფილა. პოპულარული ადამიანები ვართ და რა თქმა უნდა, საზოგადოების ყურადღება დიდია. ჩვენ ერთმანეთს კიდევ უფრო კარგად გავიცნობთ და ერთად დიდ წარმატებას მივაღწევთ.“

„ანჩელოტისგან არანაირ ზეწოლას არ ვგრძნობ, იტალიელი სპეციალისტი დიდ ნდობას მიცხადებს და ეს ჩემთვის მნიშვნელოვანია. აქ მუშაობა კომფორტულია, რადგან გასახდელში ერთსულოვნება სუფევს.“