კარლო ანჩელოტიმ „ბეტისთან“ დაპირისპირების წინ პრესკონფერენცია გამართა.

„ძალიან მოტივირებულები ვართ და გვჯერა, რომ სანტიაგო ბერნაბეუზე შეკრებილი პუბლიკა დიდ დახმარებას გაგვიწევს. „ბეტისთან“ აუცილებლად უნდა გავიმარჯვოთ და 3 ქულა ჩავიწეროთ აქტივში.“

„ანდალუსიურმა კლუბმა ტურნირი იდეალურად ვერ დაიწყო, მაგრამ შემადგენლობა შესანიშნავი ჰყავს, ამიტომ დიდი ყურადღებით თამაში გვმართებს.“

„ყველა ფეხბურთელს ცალ-ცალკე ვესაუბრე და გავარჩიეთ „ლას პალმასთან“ შეხვედრა. აქ გარკვეულ კომპონენტებში პროგრესი გვქონდა, მაგრამ მაინც ბევრმა პრობლემამ იჩინა თავი. ვეცდებით, მეოთხე ტურში გაცილებით ლაღი ფეხბურთი ვითამაშოთ.“

„ბოლო მატჩებში სულ 2 გოლი გავუშვით და ეს დიდ პრობლემად არ მიმაჩნია, მაგრამ მთავარი ის არის, რომ ბურთი უკეთესად დავიბრუნოთ, შეტევები უფრო სწრაფ ტემპში წარვმართოთ და ვეცადოთ, დასკვნით ფაზაში უფრო ზუსტები ვიყოთ.“

„რა თქმა უნდა, საუკეთესო ფორმაში არ ვართ, მაგრამ ყოველდღიურ რეჟიმში ვშრომობთ წინსვლისთვის.“

„საწყის 3 ტურში 4 ქულა დავკარგეთ, ეს ძალიან ბევრია იმ ფონზე, როდესაც ლიდერს 9 ქულა აქვს, თუმცა სეზონი გრძელია და სიტუაციას შევცვლით.“

„პენალტისტობასთან დაკავშირებით ჩემი ხედვები ფეხბურთელებმა იციან, თუმცა საბოლოო ჯამში ვინ შეასრულებს კონკრეტულ მომენტში თერთმეტრიანს, თავად ფეხბურთელები წყვეტენ.“

„სებალიოსმა დარჩენა გადაწყვიტა და ამით ბედნიერი ვარ. ესპანელი ფეხბურთელი სათამაშო დროს ხშირად მიიღებს, ჩვენ არ გვყავს ბევრი ნახევარმცველი.“

„მბაპე შეტევაში ძალიან სახიფათოა და თქვენ მალე იხილავთ ფრანგის არაერთ გოლს. არ ვფიქრობ, რომ ფრანგს ადაპტაციისთვის დიდი დრო დასჭირდება.“

„კრიტიკა ნორმალურია მაშინ, როდესაც ვერ ვაჩვენებთ სასურველ დონეს.“

„მბაპეს და ვინისიუსის კოლაბორაცია ეფექტური იქნება. ორივე ფლობს საოცარ ტექნიკას და სისწრაფეს. ჩვენ ამ კომპონენტებს აუცილებლად გამოვიყენებთ და მალე ყველას ვაჩვენებთ, რომ საოცარი შეტევის ხაზი გვყავს.“

„კილიანი და ვინი პოზიციებს ხშირად გაცვლიან, თუმცა ძირითადად მარცხენა შემტევი ბრაზილიელია, მბაპე კი ცენტრიდან თამაშობს.“

„ვინისიუსსა და ფრან ახალწვეულს შორის არანაირი გაუგებრობა არ არსებობს, ეს ყველაფერი სისულელეა. საქმე ეხებათ მაღალი დონის პროფესიონალებს, რომლებიც ითავისებენ, რომ მსოფლიოს საუკეთესო კლუბის სადარაჯოზე დგანან. ჩვენ ერთ მიზანს ვემსახურებით და ეს „ბლანკოსის“ წარმატებაა. თუ მართლაც იქნება გაუგებრობა, მე ამას მაშინვე დავასრულებ. ფეხბურთში ათწლეულების ვმოღვაწეობ და არაერთ ვარსკვლავთან მიმუშავია. მერწმუნეთ, ვიცი, როგორ რეგულირდება სიტუაცია გასახდელში და „რეალს“ ამ მხრივ არანაირი პრობლემა არ გვაქვს, ჩვენი წარმატების ერთ-ერთი მთავარი გასაღები ყოველთვის იყო ერთიანობა და ასე იქნება მომავალშიც.“