კარლო ანჩელოტიმ „ვალიადოლიდთან“ შეხვედრის წინ პრესკონფერენცია გამართა.

„ბერნაბეუზე დაბრუნება ნამდვილად სასიამოვნო იქნება. გვჯერა, რომ კარგ საღამოს გავატარებთ, გულშემატკივრებს სანახაობრივ ფეხბურთს ვაჩვენებთ და ბევრ გოლს გავიტანთ. დიდი ხანია საშინაო არენაზე არ გვითამაშია და მოგვენატრა ბერნაბეუს გარემო.“

„ბალანსის პრობლემა გვქონდა. ხარვეზების დაძლევა მარტივია მაშინ, როდესაც იცი, რა მიმართულებით უნდა იმუშავო. სწორედ ამიტომ, ჩვენ შეცდომებს გამოვასწორებთ.“

„ჯუდ ბელინგემი შესანიშნავია და გულშემატკივრებისგან დიდ სიყვარულს გრძნობს. ინგლისელის როლი კვლავ მნიშვნელოვანი იქნება.“

„დაცვის ცენტრში პრობლემები არ გვექნება. ალაბა ადრე თუ გვიან დაბრუნდება და ჩვენს რესურსს მნიშვნელოვნად გაზრდის, მანამდე კი არსებული რესურსით ვიმოქმედებთ. საჭიროების შემთხვევაში საქმეში ახალგაზრდებიც ჩაერთვებიან.“

„ჩვენ მაშინ ვთამაშობთ, როცა გვეუბნებიან, რომ უნდა ვითამაშოთ. არავინ გვეკითხება, ვართ თუ არა მზად, სწორედ ამიტომ, ფეხბურთელების კონდიციებზე ბევრი ფიქრი გვმართებს.“

„როდრიგო ძალიან კარგი იყო, როგორც ევროპის სუპერთასზე, ასევე ლა ლიგის პირველ შეხვედრაში. ბრაზილიელს აქვს ხარისხი და დიდი ინტელექტი, რომელსაც სამეფო კლუბს მოახმარს.“

„ახალი მცველის დამატება? „რეალისთვის“ სატრანსფერო ფანჯარა დახურულია.“

„ჯაკობო მთავარ გუნდში განიხილება, მას აქვს შესაბამისი ხარისხი და მოტივაცია. დარწმუნებული ვარ, საჭიროების შემთხვევაში ის საქმეში ჩაერთვება და მოწოდების სიმაღლეზე იდგება.“

„ვინისიუსის ჟუნიორის პოზიცია არ შეიცვლება. ნუ დაგავიწყდებათ, რომ ბრაზილიელის მარცხენა შემტევად ყოფნის პირობებში 2-ჯერ შევძელით ჩემპიონთა ლიგის მოგება. ბელინგემის გამო ტაქტიკა შევცვალე და ეს წარმატებული ნაბიჯი იყო, მაგრამ ვინის ცვლილებები არ შეეხება.“

„გასაგებია, რომ კამავინგას ტრავმა აქვს და მოედნის ცენტრში მარიო მარტინი გამოგვადგებოდა, მაგრამ მას წასვლის საშუალება მივეცით, რათა გამოცდილება მიიღოს და „ბლანკოსს“ უფრო ძლიერი დაუბრუნდეს. ედუს აღდგენით პროცესს კიდევ 5 კვირა დასჭირდება, რაც იმას ნიშნავს, რომ სექტემბრის ბოლოს ხელმისაწვდომი გახდება.“

„მბაპეს ბერნაბეუზე „რეალის“ მაისურით თამაში პირველად მოუწევს. დარწმუნებული ვარ, ფრანგისთვის კარგი საღამო იქნება.“

„ხვალინდელი ვარჯიში ბერნაბეუზე ჩატარდება. მსურს, რომ ფეხბურთელებმა ახალ გაზონთან გაიარონ ადაპტაცია, სხვა არაფერი.“

„ენდრიკს აუცილებლად ექნება შანსი, ვინაიდან ჩვენ არაერთ ტურნირზე გამოვდივართ. ბრაზილიელი ბევრს შრომობს და ცდილობს, შესაძლებლობები წარმოაჩინოს.“